Estimate Committee member-te'n SIPMIU hnathawhte an enfiah

Legislative Assembly hnuai-a committee péng pakhat, Estimate Committee chuan ni-min zing khan Aizawl veng
ṭhenkhata sorkar hna thawh hrang hrangte an enfiah.

Estimate Committee member-te hian Tanhril, Govt. Complex, Bawngkawn, Zemabawk, Mual-pui, Armed Veng, Bethlehem Veng, Mission Vengthlang, Tlangnuam leh Hlimen-a SIP-MIU-in tuizém a siamte an enfiah bakah, Bengthlehem Vengthlang mawng Chite-a êk sawngbawlna sewage treatment plant siam mekte an endik a ni.

Estimate Committee member-te hi chairman Lalrinliana Sailo-in a ho a; member kal dangte chu - Vanlalzawma, T Sangkunga, R Vanlalvena leh Vanlalawmpuii Chawngthu te an ni a, Dr Ngurdingliana erawh a tel thei lo.

Committee hian Chite lui kama Aizawl mipuite êk thli sawngbawlna, Sewage Treatment Plant siam mek, 10 MLD dawng tura siam an tlawh a; hna thawh mek dinhmun an enfiah.

Sewage Treatment Plant siam hna hi Eco Protection Engineer Pvt.Ltd, Chennai-in an thawk a; contract amount chu cheng nuai 2,246.27 a ni a, November 27, 2013-ah hna ṭan niin, March 2017-a zo tura tih an ni.

Sewage Treatment Plant panna kawng siam hna chu CLT Construction Pvt.Ltd, Vaivakawn-in an thawk thung a, contract amount chu cheng nuai 211.54 a ni.

Committee on Estimates-in nimina an enfiah tuizemte chu Asian Dvelopment Bank (ADB) sum hmanga Ministry of Urban Development hmalakna pakhat, North Eastern Region Capital Cities Development Investment Programme (NERCCDP) hnuaia thawh a ni a; SIPMIU chu implementing agency a ni. Tuizem siam hna chu SS Construction, Chaltlang, Aizawlin an thawk.

Vanglaini palai zawhna chhangin Estimate Committee chairman Lalrinliana Sailo chuan, SIPMIU hnuaia hnathawh hrang hrang an enfiah chhan chu, ruahman anga hna thawh a nih leh nih loh te, harsatna an tawh leh tawh loh te, an thil siamte chu mipuiin an chhawr theih hun tur enfiahte a nih thu a sawi.

Lalrinliana Sailo chuan, nimina an thil enfiahte chu a vaiin cheng vbc. 690 sênna tur a nih thu a sawi a, "PHE department leh SIPMIU hotute sawiah thil inkáwlkalh a awm nual a, thil inthuah a awm nualin a lang," a ti a; chungte chu eirûkna thil a nih leh nih loh erawh chu an la hre mai rih lo tih a sawi bawk.

Extimates Committee-in tuizem an enfiahte

1. Tanhrila ground level water reservoir (RCC). July 9, 2012-ah hna thawk ṭanin December 20, 2013-ah siam zawh a ni. Tuizem aṭangin hian tui connection 265 an pe chhuah mek.

2. Govt. Complex-a ground level water reservoir & site office (Semi RCC). October 12, 2010-ah thawk ṭanin, February 28, 2011-ah an zo. He tuizem aṭang hian in 506-ah tui connection pek a ni.

3. Bawngkawna ground level water reservoir & chowkider quarters. April 4, 2011-ah hna ṭanin, February 27, 2012-ah an thawk zo. In 1,741-ah tui connection pek mek a ni.

4. Zemabawka ground level water reservoir & site office (Semi RCC). August 16, 2010-ah ṭanin, June 26, 2011-ah an zo. In 816-ah tui connection pek a ni.

5. Armed Venga ground level water reservoir & site office. April 20, 2011-ah ṭanin February 8, 2012-ah an thawk zo. In 1,233-ah tui connection an pe mek.

6. Mualpuia ground level water reservoir, stone masonry retaining wall, approach road leh Salvation Army Orphanage-ah zun-in siam a ni. February 25, 2012-ah ṭanin December 20, 2013-ah an zo. Tuizem
aṭangin in 100-ah tui connection pek a ni.

7. Mission Vengthlanga ground level water reservoir. April 26, 2010-ah thawk ṭanin December 3, 2010-ah zawh a ni. In 819-ah tui connection an pe mek.

8. Hlimena ground level water reservoir, stone masonry retaining wall, RCC retaining wall, electric ban phun sawn leh approach road siam hna thawh a ni a, November 2, 2012-ah ṭanin, February 15, 2014 an zo. Tuizem aṭangin in 302-ah tui connection pek a ni.