Remna palai hna thawk turin Zorama'n Aizawl chhuahsan

MNF president Zoramthanga chuan remna palai hna thawka Myanmar rama hel pawl hruaitute be turin nimin khan Aizawl a chhuahsan a,Thailand khawpui Bangkok a pan.

Zoramthanga'n Vanglaini palai a hrilh danin, Myanmar Peace Mission hna thawk tur hian Bangkok a thlen hnuah, Thailand hmar lama khawpui pakhat, Chiangmai a pan dawn a, Chiangmai-ah Myanmar hel pawl hruaitute nen an inbe dawn a ni. Chiangmai-a a tih turte a tih zawhah Bangkok-ah an lêt leh ang a, chuta
ṭangin Kolkata-ah an rawn let leh dawn a ni.

MNF President hi India rama a lo luh hun tur sawi lâwk theih a la ni lo a; National Security adviser Ajit Kumar Doval-te nen an inbiak zui dan ang zelin a programme pawh sîksawi tura dah a ni. Zoramthanga chuan, tun ṭumah hi chuan Myanmar ram chhungah a lut dawn lo tih a sawi.

Zoramthanga hian October 2015 pawh khan Ministry of Home Affairs (MHA) hotute sawmna angin, Myanmar sorkar leh an ram chhunga hel pawl hrang hrangte'n nimina inremna an ziahnaa tel turin MHA hotute nen Myanmar-ah an kal a; chumi ṭum chuan Myanmar sorkar leh an rama hel pawl pasarihte'n October 15, 2015-ah Myanmar khawpui Naypyidaw-ah inremna an ziak a ni.

Nikum January leh February thla khan remna palai hna hi a lo thawk tawh bawk.