Mizorama political party-te zinga ṭhang duang ber kan ni - ZPM President

Zoram People's Movement (ZPM) chuan nimin khan kumin atan an pisa an hawng ṭan a; hawnna inkhawmah ZPM president Lalliansawta chuan, Mizorama political party-te zingah ZPM chu ṭhang duang ber a nih thu a sawi.

Lalliansawta chuan, ZPM chu pawl hrang hrang inzawmkhawm an nih avangin anmahni pawh an inhre chiang vek hman lo tih a sawi a, "Heti chung hian kawng hrang hranga hma kan laknaah hma kan sawn ve zel. Inphumkhatna ṭha zawk nei turin mahni pawl ṭheuh ṭhiata party pakhata kan inchhûnfin hnuah ECI aṭangin pawmpuina kan dawng tawh a, tunah chuan Mizorama political party zinga ṭhang duang ber kan ni ta," a ti.

ZPM President chuan, political party an nih angin an hmaa tih tur leh hma­chhawp hlen chhuak turin ke an pên zel dawn tih a sawi a, "Hetih rual hian, kan hmalaknaah Pathian duh dan pêla kal erawh kan tih tur a ni lo tih kan hriat a ngai," a ti a; an thil tihna engkimah Pathian ráwn chunga an kal a ngaih thu leh an chungah Pathian a lawm a nih chuan sorkarna pawh Pathianin a pe ngei ang tih chu a ngaihdan a nih thu a sawi. Lalliansawta chuan, ZPM-in kalphung thar an sawi ṭhin chu an la sorkar ve loh avangin mipui tan ngaihruat tur emaw, hmehbel tur emaw awm rih lo mah se, an MLA-te Assembly House chhunga an chêt dan leh MLA fund an hman dan aṭangin kalphung thar ruangám chu hriat theih a nih thu a sawi a, "Hei hian ZPM chu kalphung thar duhtu a ni tih a tilang chiang hle a ni," a ti.

Lalduhoma, MLA pawh­in thu sawiin, Mizo mipuite chu ṭhuang hnihin an kal taa a hriat thu a sawi a, "Lok Sabha MP a lo haw khan hmuaktu chi hnih 'Dam reng rawh se' tih leh 'Báng rawh se' titu a nei a ni. Kan ram leh hnam, India ram pum chhiat theihna tur party thu âwiha vote an awm," a ti a; CAB chu 'Kan do tur' a ni titute'n MP chu 'Báng rawh se' tia an lo hmuah thu a sawi. Lalduhoma chuan, BJP-te'n CAB hnuah Uniform Civil Code an buaipui leh mek tih sawiin, "An pass leh chuan kan hnam tih dan phungte kan ti thei tawh dawn lo. Chumi hnua an tih tum chu Anti Conversion Bill a ni a, hei hi pass a nih chuan sakhaw danga inlet turin sorkar pawmpuina a ngai tawh dawn. Chutiang duh lo chu opposition party chauh ni loin, kohhran leh vantlang mipui an ni," a ti.

MLA dang Vanlalhlana pawhin thu a sawi a, "Bul ṭan ṭhat a pawimawh. Mi thar duhawm tak tak hmangin kum bul kan ṭan a, ZPM hi ram nghahfak a ni. ZPM mipuite thlan tlin independent MLA-te hian ZPM a sorkar ngei theih nan theihtawp chhuaha ṭan kan lâk dawn avangin kum 2023 inthlanah chuan ZPM-in sorkarna a la ngei ang," a ti a; ZPM kawng chu an sial chawp ni loin, insial sa a nih thu a sawi. BJP sorkar hnuah India ramah Kristian tihduhdahna a nasa tih sawiin Vanlalhlana chuan, "Khawvela NGO lian ber chu India rama mi, RSS an ni a, an thil tum ber chu India ram hi Hindu ram, Hindi chauh hmanna, sorkar pawh Hindu mila kalpui a ni. RSS hian péng hrang hrang a nei a, BJP hi an political wing a ni," a ti. ZPM pisa hawn in­khawm­ah hian an party zawm tharte lawm luh nghal a ni a, an lawm luh zingah hian Congress ticket-a MLA candidate lo ni tawh leh MZP president hlui Zokailiana Khiangte pawh a tel a ni.