KHAWTHLIR

Thisen pe

Kolasib Hmarveng Branch KṬP-te chuan July 2, 2016 khan Kolasib District Hospital-ah thisen unit 34 an pe a, a petute mipa leh hmei-chhia 17 ve ve an ni. Salvation Army Youth Champhai Vengthlang CO bial leh Champhai CO bialte chuan Salvation Army Founders' Day pualin July 2 khan Champhai District Hospital-ah thisen unit 30 an pe a, a petute mipa 19 leh hmeichhia 11 an ni.

MLA-te thukhawm

Legislative Assembly hnuaia Committee on Local Fund Account member-te chu nimin khan Assembly committee room-ah an
ṭhukhawm. Committee-ah hian chairman chu John Siamkunga a ni a, member-te chu - Vanlalzawma, T Sangkunga, Lalthanliana, R Vanlalvena, Lalrinawma leh Vanlalawmpuii Chawngthu-te an ni.

AMC la inpeih lo

Aizawl Municipal Corporation (AMC) Commissioner chuan hriattirna tichhuakin, mihring piang leh thi chhinchhiahna (Registration of Births & Deaths) hna chu Aizawl khawpui bikah Economics & Statistics department-in AMC kutah hlan tawh mah se, AMC-in tunah a la khawih thei lo tih a tarlang a, "Inbuatsaih mek a ni a, kumin August 1 aṭangin AMC-ah tih ṭan hman beisei a ni," a ti.

NSUI-in lawmpui

National Students Union of India (NSUI), Mizoram chuan thuchhuah siamin, Mizoram University hnuaia degree course examination 2016-a pass zawng zawngte an lawmpui tak zet thu an tarlang.

Weighbridge endik

Kolasib-a Legal Metrology hnathawkte leh Kolasib-a thuthar thehdahtute chuan, nimin khan Kolasib Gosen Venga FCI kudama weighbridge an endik a, weighbridge chu a dik tih an finfiah.Truck driver-te chuan FCI kudam aṭanga buhfai an lakte chu Supply kudama an bûk leh pawhin an chawi belh ngai loh thu an sawi.