Rural Dev. dept-in tui leh leilung Luang ral tur venna siam hna thawk

Rural Development department chuan, Integrated Watershed Development Programme (IWDP) an kalpui mekah project pakhat Watershed Works hnuaiah hmalakna chi hrang hlawm lian pathum - Plantation including Horticulture, Soil & Moisture Conservation leh Water Harvesting Structure an kalpui mek.

RD department hotute chuan, watershed works an kalpui hlawm chi thum zingah tui leh leilung luangral tur venna (Soil & Moisture Conservation) atan bik hma an la nasa zual tih an sawi a; nasa taka ṭan an lak avangin Mizoram hmun hrang hranga kut hnathawktute'n a zar an zo nasa hle tawh niin an sawi.

RD hotute sawi danin, Soil & Moisture Conservation-in a tum ber chu, tui leh leilung luang ral vanga ram chhe zel tur ven te, ram bua awm mekte humhalha siam ṭhat te, kum tin ram hman tlak loha siam ṭhinte awmze nei zawka hman tlak leh chhawr ṭangkai theiha siam te, thlai chîn nana hman tlak tawh lohte hman leh theih tura buatsaih te, tui hna a pun theih nana hmalakte a ni.

Tui hna siam chhuak leh turin kawng chi hrang hrangin hma an la a; chung zingah chuan terrace siam, khur laih, tui leh lei luang ral tur danna siam, lei kal ral tur venna atan lung fûn siam leh thil chi hrang hrangin hma an la ṭhin.

RD hotute chuan, terrace an siam chu hmun remchang leh buatsaih theihna apiangah kum khat thlai aṭanga thlai kumhlun chînna atana hman tura an kalpui ṭhin thu an sawi a, "Terrace siam dawn reng rengin a chunglâng lei ṭha lak khawm hmasak ṭhin a ni a, chungte chu terrace laih zawhah sem darh leh ṭhin a ni," an ti.

Terrace an siam avangin tui leh lei luang ral tur nasa takin a ziaawm phah nia sawiin, thlai chînte pawh terrace leh terrace ni loa mi chu khaikhin thamin a inthlau thei niin an sawi.

Tui leh lei kal ral tur venna atan khur laih pawh an hmang ṭangkai hle tih sawiin RD hotute chuan, "Khur laih hian a len zawng, thûk zawng leh sei záwngte a ram mil zelin ruahman ṭhin a ni a, Mizoram ang ram awih tlânah chuan a ṭangkai zual hle," an ti a; chu chuan tui leh lei luang ral tur tam tak dang khawlin hnáwng a siam reng a, thlaite tan a ṭangkai hle niin an sawi.

RD department hotute sawi danin, tui leh lei ral tur khuaptu (check dam) hmangin ṭan an la bawk. Check dam siam dan chi li an hmang a, chungte chu - earthened checkdam, loose boulder checkdam, brushwood checkdam, RCC checkdam-te a ni.

Soil & Moisture Conservation an siamnaah hian unit khatah Rs. 11,250 an hmang tlangpui a, a siamnaa sum sen zat chiah erawh a ni lo. An siamna hmun azirin hmun pakhatah unit 5/6-te pawh an siam a ni.