High Court Judge-in Champhaia Court leh Sessions Court hmun tur a en

Gauhati High Court judge Michael Zothankhuma chuan, July 2, 2016 khan Champhai District Court a enfiah a; Champhai Zote-a Champhai District Session Court hmun thar tur leh District Session Court-in in an luah lailâwk turte hmun remchang a enfiah bawk.

Justice Michael Zothankhuma chuan, Champhai District Court hmunhma leh JO Complex-te enfiahin, District Court hmunhma neih mek chu a len tawk loh vangin Session Court dah mai theih a nih loh thu a sawi.

Champhai Circuit House-ah Champhaia sorkar department hotute leh YMA sub-headquarters, Champhai hruaitute a kâwm a, Champhaiin Sessions Court an mamawhna kawng hrang hrangte an lo thlen.

Sorkar department hotute leh YMA Sub-Hqrs. hruaitute chuan, Champhai district chu ramri depa awm a nih avangin Session Court-a ngaihtuah ngai thubuai a tam bik thu te, thubuai neitute leh thuhretute Aizawl kalna senso a hautak thu leh chu vang chuan sorkarin leiba cheng nuai 50 vel a neih mek thute an lo hrilh.

Michael Zothankhuma chuan, Champhai district mipuite harsatna tawh dan chu a hriatthiampui thu leh District Sessions Court dah thuai a nih theih nan theihtawp chhuah a tum thu a sawi.

Michael Zothankhuma chuan, Champhai Zote khawtlangin Session Court hmun tur ram bigha 7 chuanga zau an pek chu ram ruak a la nih vang leh inbengbel turin kum 5 vel hun an la mamawh dawn vangin Champhaia District Session Court dah a nih dawn pawhin office luah lailawk tur ngaihtuah a ṭul thu a sawi a; "Court hmunhma ngaihtuah chu state sorkar mawh a ni a, Court dinna sum mamawh chu sorkar laipui tum tur a ni thung," a ti.

High Court Judge hian Zotea Session Court hmun tur ram, land lease tihfel vek tawh chu a hmunah a tlawh a; chak zawka hmalak a nih theih nan concept paper buatsaih ran a ṭul thu a sawi. Champhaia Session Court dah a nih pawhin pisa luah lailâwk turin Zotea Integrated Industrial Development Centre (IIDC) hmun a en nghal bawk.