India tibuai hmasatu-ah inngai lo

MNF senior vice president Tawnluia chuan nimina Mizo Hnam Rûna inkhawmah thu sawiin, mi ṭhenkhatin MNF-te chu India tibuai a, buaina cho chhuak hmasatu anga an sawi ṭhin chuan an thinlung a tihnat ṭhin thu a sawi.

Tawnluia chuan, hnam thinlung putna lo piang chhuak, Mizo nationalism spirit lo alh thar timit turin India-in a sipai leh ralthuamte Mizoramah a thawn luh vanga buaina inṭan a nih thu a sawi a, "Kuttum ringawta India sipaite lo do lêt chi a ni lo a, ralthuam lek ve dawn ila, IPC a kalh tiin, min man fai vek an tum si a. Huaisen takin keimahni leh keimahni zalenna kan inpe a, inrêlbâwlna hran neiin independence kan puang a ni,” a ti.

Mizoram chief minister Lal Thanhawla leh mi ṭhenkhatin June 30, 1986-a India leh MNF inremna ang chu July 1, 1976-ah Shillong-ah neih ni tawh anga an sawi ṭhin chungchangah Tawnluia chuan, "Khami ṭuma inbiakna kha inremna a ni lo," a ti a; Shillong-ah MNF leh India palaite'n inremna an siam lo a, inbiak chhunzawm remtihna leh a ruangám sawihona thuchhuah inṭâwm, Joint Statement niin a sawi.

MNF Sr. Vice President chuan, June 30-a Remna Ni kum 30-na Central YMA bultuma hman a ni chu ropui a tih thu leh lawmawm a tih thu a sawi a; zawngchhang thlak hlea a hriat thu a sawi bawk.