Mau hi kan economy siamṭhatna tur - Chief Minister
Nimin khan Hnahthialah chief minister Zoramthanga, Horticulture department enkawltuin District Horticulture Office (DHO) a hawng. Chief minister chuan, mau chu Mizoram economy siamṭhatna tur a nih thu a sawi.
CM Zoramthanga chuan, Horticulture department a pawimawh thu sawiin, "Thlaia Mizoram intodelhna tura hma latu an ni a, chu aia pawimawh chu bamboo (mau) hi a ni. Hnahthial ram hi raw chìnna tur ram ṭha a tamin ka ring, lo chíng ula, hmapui kan rawn la dawn. Chu chu kan economy siamṭhatna tur a ni dawn. He lai hi a pawimawh em em a, ministry semtu kan nih angin, kei pawhin Horticulture department hi ka thlang a, ka idea neih kha mi dangin an tihhlawhtlin theih dawn loh avangin," a ti.
Chief Minister chuan, sorkarin hmasawnna thlen tura a hmachhawpte chu Covid-19 avangin chak taka bawhzui theih a ni lo a, chuti chung chuan hmalak theihna lai laiah nasa taka hmalak a nih thu a sawi.
Zoramthanga chuan, "Hri léng a ziaawm zel a, nun pangngaia kan nun theih hunah chuan nasa taka hmalak belh a ni ang. Sorkar chuan hmathlir ṭha tak nen, ngaihtuahna puitling tak hmangin ram pum tana ṭha turin theihtawp a chhuah zel a ni," a ti a; ram hausakna hâi chhuak thiam a, ram hmasawnna atana theihtawp chhuahpuiah mipui a sáwm.
District office hmunpui siam chungchangah CM Zorama chuan, pisa dàwrtu tur mipuite véng hrang hranga an kal kual ngai loin, hmun khata an dàwr zung zung theih nan ruahmanna siam a nih thu a sawi a, "Hmun khatah department hrang hrang office-te chu a leng chin chin dah khawm a ni ang. Hei hian office thawktute karah thawhhona ṭha zawk a thlen ngei ka ring," a ti.
Bialtu MLA Dr R Lalthangliana, minister chuan, DHO chu district-a kut hnathawka eizawngtute tan a ṭangkai tur thu sawiin, "Covid-19 karah sorkarin theih ang angin hna a thawk a, hmasawnna hmuh tur hrang hrang a awm. Hri léng lo phei se tun aia district office tam zawk a awm tawh a rinawm," a ti a; hripui léngah Mizoramin Pathian hruaina a dawn thu a sawi.
Horticulture Development Board vice chairman Prof. F Lalnunmawia, MLA pawhin thu sawiin, thuneihna sem zâi zawnga inrêlbàwlna chu rualkhai zawka ramin hma a sawn theihna tura pawimawh a nih thu a sawi a, "Office thar hawn hian hmasawnna dik tak a thlen theih nan loneitute pawhin chhawr ṭangkai nachang in hriat a pawimawh," a ti.
Inkhawm hi Horticulture secretary JC Ramthanga'n a kaihruai a, Hnahthial Town VC Association Chairman-in Hnahthial khuaa sorkar hmalakna avangin an lawm thu a sawi a ni.