Mizo mipuite nen inkungkaihna ṭha neih zel kan duh - AR DIG

Assam Rifles (AR) hotute chuan nimin khan sector headquarters, Khatlaah thuthar thehdarhtute an kawm a; AR 23 Sector DIG Brig. Digvijay Singh chuan, AR thupui 'Friends of the Hill People' (Tlang mite ṭhian) tih a nih angin, Mizoram mipuite nen inkungkaihna ṭha neih chhunzawm zel an duh thu a sawi.

Brig. Digvijay Singh chuan, "Assam Rifles thupui, 'Friends of Hill People' tih hi ka thupui ber a ni a, Mizoram mipui nena inkungkaihna ṭha neih reng kan duh," a ti a; Mizote leh AR-te inkungkaihna chu ṭha  viau mah se, hmasawn zelna tur an nei tih a sawi a ni.

AR general staff officer-2 Maj. Ram Vinodh S chuan Mizorama Assam Rifles hmalakna hrang hrangte leh media-te nen inpawhna ṭha zawk a awm theihna tura ruahmanna an neihte a sawi.

Maj. Ram Vinodh chuan, Assam Rifles-in ramri vên, dan loa Myanmar aṭanga bungraw lut tur vèn, ruihhlo ven leh thil dang dangah hmalakna tam tak an neih thu a sawi a, "Mizoram hi damdawi hmansual leh ruihhlo lamah India ramah a sang ber páwl a ni a, he lamah hian kan ṭanho a ngai hle a ni," a ti. Covid-19 chungchangah thingtlang hmun hrang hrangah inzirtirna (awareness) an neih tawh thu a sawi bawk.