COVID-19: Mizoram dinhmun Hripui vei mi 9 hmuh belh a ni

December 17, Ningani khan Mizo­ramah Covid-19 vei mi pakua hmuh chhuah a ni a, an zingah Mizoram chhunga kai 4 an awm. Nimin khan hripui laka fihlîm tawh mi 17 chhuahtir an ni thung.

Covid-19 vei hmuh chhuah tharte chu mipa pariat leh hmeichhia pakhat an ni a; ZMC laboratory-a hmuh mi pahnih, TrueNAT-PCR hmanga hmuh mi pali leh Rapid Antigen Test (RAT) hmanga hmuh mi pathum an ni.

Nimin khan Covid-19 laka fihlîm tawh mi 17 chu enkawl­na hmun aṭangin chhuahtir an ni a; Aizawl district-ah mi 11, Lunglei district-ah mi panga leh Kolasib district-ah mi pakhat an chhuak a ni.

Mizoramah swab sample 1,69,138 endik tawh aṭangin Covid-19 positive mi 4,094 (2.42%) hmuh chhuah a ni tawh a, mipa 3,013 leh hmeichhia 1,081 an ni. Nimin tlai dar 5 thleng khan mi 3,940 (96.24%) chhuahtir an ni tawh a, mi pasarih (0.17%) thi tawhin, enkawl mek mi 147 (3.59%) an awm.

Mizorama Covid-19 positive hmuh chhuah tawh mi 4,094 zinga mi 1,943 chu Mizoram chhunga kái an ni a, mi 2,151 chu state páwn aṭanga rawn lût an ni.

December 17-ah swab sample 936 endik a ni a, chu'ng zinga Covid-19 vei mi pakua hmuh chhuah niin, endik zat aṭangin 0.96% a ni. ZMC laboratory-ah Aizawl, Lunglei leh Mamit district-a mi 317, TrueNAT-PCR hmangin district pariatah mi 173 leh, RAT hmangin district pariatah 446 endik a ni.

Hri vei hmuh thar mi pakua zingah natna (Covid-19 symptom) lang chhuak mi pakhat, nausen thla 9 mi a awm. Mizoram chhunga kái pali an awm a, tualchhunga káite chu hri an kài ṭanna hriat theih vek a ni.

Sorkar thuchhuah tarlan danin, ZMC laboratory-a hripui vei hmuh chhuahte pahnihte chu tualchhunga hri kái leh state páwn aṭanga tun hnaia rawn lut pakhat ve ve an ni a; Covid-19 symptom an nei lo.

Covid-19 vei TrueNAT-PCR hmanga hmuh chhuah mi palite chu mipa vek an ni a, an zingah nausen thla 9 mi pakhat telin, mi dang zawng puitling an ni. An vaiin state páwn aṭanga tun hnaia rawn lut an ni a, nausen thla 9 miin symptom a nei.

RAT hmanga Covid-19 positive hmuh chhuah mi pathumte chu mipa vek an ni a, naupang kum 7 mi pakhat a tel. An vaiin Lawngtlai district-a mi, tualchhunga hri kái vek an ni.

ZMC-a hmuh chhuahte:

Laipuitlang - 1: Hmeichhia kum 25, tualchhunga kái, kài ṭanna hriat, symptom nei lo.

BSF, Aizawl - 1: BSF sipai mipa kum 30, J&K aṭanga rawn lut, an camp-a khung hran lai, symptom nei lo.

TrueNAT-PCR-a hmuh:

BSF, Mélte - 2: 131 Bn. BSF sipai mipa 30 leh 35, tun hnaia state páwn aṭanga rawn lut, Meltea inkhung lai, symptom nei lo ve ve.

Vairengte - 1: Mipa thla 9, tun hnaia Shilong aṭanga haw, quarantine facility-a awm lai, symptom nei.

Serchhip - 1: Mipa kum 43, West Bengal aṭanga rawn lut, Tantia Constructions-a thawk, quarantine  facility-a awm mek, symptom nei lo.

RAT-a hmuh chhuah:

Mampui - 2: Mipa kum 21 leh 38, hri kai ṭanna hriat, symptom nei lo ve ve.

Lawngtlai Bazar Veng - 1: Mipa kum 7, hri kài ṭanna hriat, symptom nei lo.