KHAWTHLIR

Thisen pe

Helen Lowry College chuan nimin khan thisen pek an huaihawt a, Civil Hospital, Aizawl tan thisen unit 29 an pe a, petute mipa 24 leh hmeichhia panga an ni. Sihphir Higher Secondary School pawhin nimin vêk khan Synod Hospital tan thisen unit 24 an pe a, petute mipa 17 leh hmeichhia pasarih an ni.

Climate change

Assam Rifles chuan nimin khan Champhaia an hmunah sik leh sa inthlak chungchang leh leilung leh a chhunga awmte humhalh chungchang inzirtirna hun an hmang a, thing ṭiak eng emaw zat an phun nghal. He hun hi 'Climate change' tih thupuia neia thirsakawr hmanga India ram fan chhuah tuma kal mek leh Mizorama chám mek Jayant Mahadev, Mumbai-in a hmanpui a ni.

MPF thukhawm

Mizoram People's Forum (MPF), Lai Autonomous District Forum chu August 7, 2024 khan LIKBK Assembly Office-a Lairam Gospel Centenary Hall, Lawngtlaiah an ṭhukhawm a, MPF Gen. Hqrs aṭangin general secretary Rev. Lalramliana Pachuau leh hruaitu dang pahnihin an hmanpui. MPF hmalakna pawimawh hrang hrang sawiho a ni a, MPF District Forum hruaitu tur ruat thar a ni bawk.

Heroin man

Assam Rifles sipaite chuan August 8, Ningani khan Champhai district-a Mélbûk huam chhungah Zokhawthara mipa pakhat hnen aṭangin heroin (no. 4) gram 134 an man a, Zokhawthar police hnenah an hlân.

NQAS nih lawm

Civil Hospital, Aizawl (CHA) chuan India rama sorkar damdawi-in ṭha bik tehna, National Quality Assurance Standard certification a hmuh chu nimin khan CHA Conference Hall-ah an lawm. Lawmna inkhawm hi CHA medical superintendent Dr ST Lalruatfela'n a kaihruai a, Health secretary Sangchhin Chinzah khuallian a ni. NHM mission director Dr Eric Zomawia leh CHA medical superintendent lo ni tawhte'n an hmanpui bawk.