Sangau-Saisihchhuah kawng tur ram pek loh vangin sum hnûk kîr

Development of North Eastern Region (DoNER) minister Dr Sukanta Majumdar chuan, Sangau-Saisihchhuah kawng sialna atan cheng vbc. 66.08 pek tawh chu Mizoramin June 2024 thlengin ram a thlawna a pek theih loh avangin hnuh kîr a nih thu a tarlang.

DoNER Minister hian nimin khan Mizoram Rajya Sabha MP K Vanlalvena zawhna ziaka chhángin, Sangau-Saisihchhuah kawngpui sialna atan February 10, 2021-ah cheng vbc. 66.08 pek (sanction) a nih thu leh hna thawk turin Border Road Organisation (BRO) thlan a nih thu a ziak.

Dr Sukanta Majumdar chuan, Sangau-Saisihchhuah kawngpui sialna atan Mizoramin June 2024 thlengin a thlâwna ram a pek theih loh avangin kawngpui laihna tur sum vbc. 66.08 pek tawh chu hnuh kîr a nih thu a sawi a; sum chu Thingsai-Pangkhua-Sangau road project-ah Sangau-Saisihchhuah-Siallam kawng laih nan kum 2023-2028 chhunga thawhna atan General Staff (GS) Funding of BRO scheme-ah dah a nih thu a tarlang bawk.

School Education minister ni bawk Dr Sukanta Majumdar chuan MP K Vanlalvena zawhna dang ziaka chhángin, Lengpuia National Institute of Technology (NIT), Mizoram campus dinna tura sorkar laipuiin sum a pek zat chu vbc. 669.75 a nih thu a tarlang.

NIT, Mizoram campus atan hian forest clearance tifel turin sorkarin tih tur ṭulte a tih mek thu te, kum 2010-a bul ṭan NIT, Mizoramah zirlai 668 an awm mek thute a tarlang bawk.