Vawk thi zangnadawmna pe vat turin Mizoram MP-in sorkar laipui a ngen

Mizoram Lok Sabha MP Richard Vanlalhmangaiha chuan nimin khan Lok Sabha session-ah thu a sawi a; vawk pùl hri African Swine Fever (ASF) vangin Mizoramah vawk tam tak a thih tawh thu sawiin, vawk vulhtute tana Mizoram sorkarin zangnadawmna a dil chu tihfelsak thuai turin sorkar laipui a ngen.

Richard Vanlalhmangaiha chuan, ASF vangin Mizoramah vawk vulhtute'n harsatna nasa tak an tawh thu leh an vawk chànte hlut zawng chu cheng vbc. 200 chuang a nih tawh thu a sawi a, "Vawk hri léng vanga vawk vulhtute chhawmdawlna tur central aṭangin puihna kan la hmu lo. Sorkar laipuia Mizoram sorkarin vawk vulhtute hnena zangnadawmna tura ruahman project a siam cheng vbc. 26.725 hi min tihfelsak thuai turin Union Animal Husbandry Minister ka ngen a ni," a ti.

Mizoram MP chuan, sorkar chhinchhiahnaa a lan danin, February 2024 aṭanga tun thlengin Mizoramah ASF avangin vawk 8,251 a thi tawh a, vawk 15,000 chuang suat a nih tawh thu leh, hri léng vanga vawk thi, la chhinchhiah si loh eng emaw zat a awm bawk thu a sawi a; tun hnai mai ni loin, tun hma aṭang tawhin ASF-in Mizoram a tihbuai tawh thu leh Mizorama vawk vulhtute'n an tawrh nasat thu a sawi bawk.

Parliament session-a MP Richard Vanlalhmangaiha chêt dan hi ZPM party chuan chhuanawm an tih thu thuchhuah siamin an tarlang a, "Mizoramin harsatna lian tak kan tawh mek au chhuahpui ngei tumin zero hour-ah ṭum li lai Speaker hnenah thu sawina hun a dil a, hetiang MP, ram tana ṭhahnemngai tak leh huaisen tak kan nei hi chhuanawm kan ti tak zet a ni," an ti.