SCERT-in an din champha an lâwm

State Council of Educational Research and Training (SCERT) chuan nimin khan an directorate-ah an kum 40-na, ruby jubilee an lawm a, School Education minis­ter Lalchhandama Ralte-in a hmanpui.

Jubilee lawmna inkhawm hi School Education secretary Esther Lalruatkimi'n a kaihruai a; Education Minister chuan, SCERT chu zirna bulṭhut lama thuneitu an nih thu sawiin, "Zirnaah miin bul an ṭan ṭhat a, zirna ṭha an hmuh a, an tui theihna atan SCERT a pawimawh. Kan Mizo nunphung te, nationalism-te an naupanlai aṭanga kan intuh thar a pawimawh. A bul tê aṭangin  zirlai dang rualin kan Mizo nunphung leh nationalism-te hi zirlaibuah telh thiam a ṭul. Hmasawn tum lutukna lamah naupangte'n Mizo nunphung an hloh a hlauhawm," a ti.

Sorkar enkawl sikula lut an tlem lutuk chu veiawm a tih thu sawiin Lalchhandama chuan, "Zirtirtu training chhuak vekin an zirtirna hmun, uniform leh chawchhun pawh a thlâwna semna sikulah zirlai an tlem ta lutuk hi ngaihtuah chian a ngai. Fee to tak taka lâkna, hmun nuam lo zawka zirlaite result a ṭhat chhan hi chhui chian a ngai a ni," a ti a; DIET-a thuneitute chu zirtirtu an training-naah an hnaa inpumpek tak tak tura an zirtir ngaia a hriat thu a sawi. Jubilee lawmna inkhawmah hian Human Resources Development Board vice chairman L Thangmawia, MLA pawhin thu a sawi a; SCERT din chhoh dan a lem nena entir a ni bawk.

SCERT hi January 20,1980-ah Direc­torate of School Education-a Academic Wing turin din a ni a, India rama SCERT 36 zinga mi a ni. A din tirh aṭangin central scheme leh UNICEF project bakah, Mizo­ram state scheme eng emaw zat an enkawl. September 1989 khan SCERT leh Science Promotion Wing chhûn fin a ni a, kum 2008-ah directorate hranpaah siam a ni.