National Deworming Day hman a ni

Nimin khan Mizoram hmun hrang hrangah rûlhût do beihpui thlakna, National Deworming Day (NDD) hman a ni a, rûlhut laka inven dante inzirtir a nih bakah, naupangte hnenah rûlhût hlo (damdawi) pek a ni.

NDD hi Aizawlah chuan Helen Lowry Higher Secondary School-ah hman a ni a, Health secretary Sangchhin Chinzah chuan khuallian niin a hawng. Khuallianin thu a sawi bakah NHM mission director Dr Eric Zomawia'n thu a sawi a; Reproductive and Child Health state programme officer Dr Lily Chhakchhuak-in rûlhût chungchang leh invenna tura thil pawimawhte a sawifiah.

Aizawla NDD hmannaah hian Women & Child Development, PHE, School Education leh Rural Development department aiawhte an tel a ni.

NDD hi kum 2016 aṭangin kum tin hman a ni a, kum khatah vawi hnih hman a ni ṭhin. Naupang leh tleirawl kum 1-19 inkar hnenah a thlâwnin rûlhût hlo (Albendazole) eitir ṭhin a ni a; sikul leh anganwadi centre-ahte pek ṭhin a ni.

National Deworming Day hi nimin vêk khan Champhaia BC Lalthlamuana English Academy-ah te, Kolasib-a Ṭumpui Middle School-ah leh Mamitahte hman a ni a; sikul naupang eng emaw zat hnenah rûlhût hlo pek a ni.