Safai Apnao, Bimari Bhagao campaign

Aizawl Municipal Corporation (AMC) chuan nimin khan AMC Auditorium-ah Swachh Bharat Mission (SBM) hnuaia Safai Apnao, Bimari Bhagao (SABB) campaign an hmang a, Aizawl mayor Lalrinenga Sailo-in hmanpuin, AMC Ward Committee, Aizawl City Local Council Association leh local council tin aiawhte an tel.

Aizawl Mayor chuan, Aizawl veng hrang hranga chhiatna thleng ṭhin chu AMC leh LC-te vang niin social media ṭhenkhatah sawi a ni ṭhin niin a sawi a; chhiatna thlengte chu politics-a inbeih nan hmang lo a, chhiatna laka invênnaa thawkho zawk turin kal khawmte a chah.

AMC-a thawkte an indaih lo hle nia sawiin Mayor chuan, chhiatna thleng leh faina lama a hmatáwnga awm ṭhinte chu LC-te an nih thu sawiin, veng chhung faina ngai pawimawh tur te, a theih leh remchan dan anga mipuiin ruahtui khâwl an uar theih nan hma la turin LC-te a fuih.

Inkhawm kaihruaitu AMC commissioner K Lalhmingliana chuan, SABB chu SBM (Urban) 2.0 hnuaia hmalakna thar a nih thu leh, SABB-in a tum ber chu faina leh thianghlimna hmanga natna ûm bo tura hmalakna a nih thu a sawi.

SABB Campaign-ah hian resource person Dr Vanlalrengpuia Chinzah, Integrated Disease Surveillance Project state nodal officer-in natna inkai chhâwn theih chungchang a zirtir a ni.