Lungleiah tualṭo hnamte ní hmang

Tualṭo hnamte ní: Zo Re-unification Organisation chuan nimin khan Saikuti Hall, Lungleiah tualṭo hnamte ní, International Day of the World's Indigenous Peoples an hmang a, Legislative Assembly speaker Lalbiakzama'n a hmanpui.

International Day of the World's Indigenous Peoples hmannaah speaker Lalbiakzama chuan, Zo fa, ram hrang hranga awmte hnam anga inpumkhat a, inpeizâwn a, intuamhlâwm tawn chu tun dinhmuna thlen chin a la nih rih thu a sawi.

Lalbiakzama chuan, "Tuna kan thlen chinah kan ti ṭha thawkhat viau nâin hmasawnna tur kan la ngah. Hnam anga min ei ral mektu hlemhletna, ruihhlo leh intihhrannate hi kan do tlàn a ṭul a, mahnia ro inrêl tura danglamna thlen turin ṭhalaite an pawimawh," a ti a; ram leh hnam tan pên chhuak turin ṭhalaite a sáwm.

Inkhawmah hian Lunglei High Powered Committee vice chairman V Malsawmtluanga, MLA, adviser to CM leh ZORO vice president Lalmuanpuia Punte, Myanmar Chin Affairs minister Lalrinmuani, Myanmar Chin Hills MP Khawtinsiami leh Bangladesh palai Zingkhumliana (Bawm)-te pawhin thu an sawi.

Day hmannaah hian Lunglei South bialtu MLA Lalramliana Papuia leh Lunglei Municipal Council chairman Lalzuithanga te, Myanmar, Bangladesh, state páwn leh Mizoram hmun hrang hrang aṭangin Zo hnahthlak hnam leh pawl hrang hrang aiawhte leh zirlaite an tel a ni.

RESOLUTION

1. Zofa - India, Myanmar leh Bangladesh sorkar awp hnuaia chengte hi hnam khat, thlahtu thuhmun, thisena inzawm, ṭawng khat hmang (ṭawng khat, chi bil ṭawng hrang hrang nei), nunphung thuhmun, serh leh sâng inkhawih pawlh, beiseina hrui khat vuan a, 'Dam leh tlang khatah, thih leh ruam khatah' ti ṭhin unau dik tak kan ni.

2. British-in an ram awp remchan dan anga Zo fate luah ram an ṭhen hrang a, mipui min ṭhendarh a, kan dikna chanvo min tihchhiatsak hi kan tan anchhia a ni. ZORO-in Zo fa, ṭhen darha awm tawhte kan dikna chanvo nei let leh tura insuihkhawm leh tura hma an la hi a dik kan tiin kan pawm a, tharum thawh loa dikna hmachhuana insuihkhawm tura beihna hi ṭha kan ti a, kan thawp tlat a ni.

3. Zo fate insuihkhawm lehna tura ZORO-in a beihna hi India, Myanmar leh Bangladesh-a sorkar luah Zo fa zawng zawngte'n thlawp tlat a, kan insuihkhawmna tura thawk tlang turin kan ngen e.