Solar power plant bun belh turin hmalak mek a ni - Power Minister

Power & Electricity (PE) minister F Rodingliana hoin nimin khan PE department hnathawh dan thlir letna leh sorkar power policy inhrilhfiahna hun hman a ni. Minister chuan, Mizoram hmun hrang hrangah solar power plant bun belh turin private company-te nen hmalak mek a nih thu a sawi.

PE Minister chuan, nizung chakna (solar power) hmanga kawlphetha siam turin nasa taka hmalak a nih thu a sawi a, "Tun dinhmunah Thenzawlah megawatt 10 siam thei tur hna thawh mek a ni a, Mizoram hmun hrang hrangah solar power plant bun belh turin private entrepreneur-te nen ṭangkawpin hmalak mek a ni bawk," a ti.

Thawktu indaih lohna a nasat thu leh thawktute thawhrimzia a hriat thu sawiin Minister chuan, "Sorkar sum leh pai dinhmun avangin thawktu thar lak zung zung a harsa a, hei vang hian a tam thei ang ber privatisation leh outsourcing kalpui tum a ni," a ti a; department-a thawktute chu PE department hna mi dang hnena hlân lam hawia ngaihtuahna sénga rilru thar pu turin a chah.

F Rodingliana chuan, kawlphethaa intodelh tura sorkar power policy leh hmachhawp ṭhenkhat sawiin, "Hydel project bikah Mizoramin kawlphetha megawatt 3,600 chuang a siam theih laiin, tun dinhmunah megawatt 40 pawh tling lo a siam chhuak mek a, hei hi a veiawm a ni," a ti.

Kum 3/4 chhungin kawlphetha mamawh MW 40 dáwna a sàn thut avangin PE department hmanruate'n a dâwl zo tawh meuh lo tih sawiin PE Minister chuan, "Hei hian kawlphetha peknaah harsatna a siam nasa. Mamawhna sang thut dâwl zo tur hian hmunhma leh bungrua tichangtlung turin state sorkar pawisa bakah central lamah nen hmalak mek a ni," a ti. Cyclone Remal-in khua 100 vela power line a tihchhiat zinga 80% chuang ni hnih chhunga siamṭhat hman a ni chu thawktute inpekna leh thawhrimna a nih thu a sawi bawk.

Ṭhutkhawm hi PE secretary K Lalrinzuali'n a kaihruai a, SDO chin chung lam an tel. Chief engineer-te'n report an pe a, circle hrang hrangin harsatna an neihte an sawi a ni.