Prayer & Protest Day hmang dawn

National Council of Churches in India (NCCI) ruahman angin Mizoram Presbyterian Kohhrante chu zanin hian kohhran inkhawmah India rama Dalit Kristiante leh Dalit Muslim-te enhran leh thliar bik an nih avangin an ṭawngṭairual dawn.

Dalit Kristiante leh Dalit Muslim-te enhran an nih avangin National Council of Churches in India (NCCI) hnuaia kohhrante chuan August 10 hian National Day of Prayer & Protest an hmang dawn a; India rama NCCI member kohhrante chu ṭawngṭai turin an ngen a ni.

India sorkarin kum 1950 khan 'The Constitution (Scheduled Castes) Order' a pawm a, chutah chuan 'Hindu sakhaw betute lo chu scheduled caste an ni thei lo vang' tih a ni. Kum 1956-ah siamṭhatah Sikh sakhua rîn lut tel a ni a, kum 1990-ah Buddhist rîn luh leh a bawk. He dan avang hian Dalit Christian leh Dalit Muslim-te chu tun thlengin scheduled caste an la ni ve lo. Hei hi duh loin NCCI chuan kum tin August 10 (India President-in hming a ziah hnan ní)-ah National Protest Day an hmang ṭhin.

National Day of Prayer & Protest hi Synod Office-a thawkte chuan nimin khan an hmang a; tualchhung kohhrante'n zaninah hmangin an ṭawngṭai rual dawn a ni.