MNF leh Congress thawhho chhan MNF Sr Vice President-in a sawifiah

MNF senior vice president Dr R Lalthangliana chuan, AMC Ward-VI by-election-ah MNF chu a mala a din loh chhan leh Congress party nen an thawh dun chhan sawiin, Pathian remruat a nih thu leh lai leh laiah intâwkin lungrual taka an thawkho thu a sawi.

Dr R Lalthangliana hian nimin khan Mizo Hnam Rûna chhung inkhawmah thu sawiin, "MNF Nomination Committee bakah NCC leh PAC-te nen uluk taka ngaihtuah a ni a, a ṭul a nih chuan thawhpui neih kan titlu. Congress pawhin candidate tur hial pawh an lo hual ru tawh a, corporator boral ta Pu John Zosangliana nupui Pi Lalrinfeli hi lusûn mek a ni tih hriain an ngaihtuahnaah a lo awm ve reng a. Congress pawh kan kar vang ni loin, Pathian remruat liau liau a ni a, tiin lai leh laiah intâwkin lungrual takin kan thawkho thei ta a ni," a ti.

MNF Senior Vice President chuan, kumina Lok Sabha inthlana vote hmuh kha AMC by-election-ah tehfunga hman a nih chuan Congress leh MNF candidate inṭâwm chu chiang taka a tlin ngei a beisei thu a sawi a; MNF leh Congress thawhhona karah tute'n emaw hêm thlak an tum pawhin, an thutiamah nghet taka an din tlat tur thu leh agreement angin khawng taka an kal tur thu a sawi bawk.

Inkhawmah hian AMC Ward-VI by-election-a MNF leh Congress candidate inṭâwm Lalrinfeli hmelhriattirna hun hman a ni. Lalrinfeli chuan, a pasal hmun ruak luahkhat turin Congress leh MNF-te'n an sawmna zahawm a tih em avanga pên chhuak a nih thu a sawi.