Party-ah piantharna a thlen a ngai - MPCC General Secretary

Congress party chuan nimin khan Congress Bhavan-ah political session an hmang a; MPCC general secretary Dr Lallianchhunga'n thu sawiin, rorelna dik leh rorelna ṭha din turin political party-ah piantharna a thlen a ngaih thu a sawi.

Dr Lallianchhunga chuan, sorkar ṭha dinna tura an kawngpui chu tàwp chin nei lo a nih thu sawiin, "Sorkar ṭha aṭangin sorkar ṭha lehzual nei tura hma la tur kan ni. Kan hruaitu kal tate khan kan ram leh hnamin kan zawh tawk zelin hma min sawnpui a ni," a ti.

Mizoramah vote base politician an tam avangin sorkar a zan kal lek lek ṭhin nia sawiin Lallianchhunga chuan, "Rorelna dik leh rorelna ṭha din tur chuan political party-ah hian piantharna a thlen a ngai. ZPM hian chutiang ni lo chuan sorkarna an chang a, danglamna a thleng thei lo a ni," a ti a; ZPM sorkar chu a chîrî hle niin a sawi.

MPCC General Secretary chuan, Mizoramin value based hruaitu a mamawh nia sawiin, "Political party-te pawn kan mamawh. Mithiamte pawh ka challenge duh chu, politic hi inluhchilh ang u. Mithiamte'n politic in luhchilh loh chuan mi thiamlo zawkte'n ram an kaihruai a, ramin a tuar ṭhin," a ti.

Dr Lallianchhunga chuan, CM Adviser pakhatin 'Mipui phun ri kan hre lo' a ti chu an lal tawhzia lantirna a nih thu te, tui leh electric supply chhia avanga mipui phun rî hre thei lo ram hruaitu an nei chu pawi a tih thu te, Home Minister-in ZPM sorkarah Mizorama pung ber tur chu pûm a ni a, tuthlawh hralh a kal ber dawn nia a sawi laiin, ZPM sorkara pung chak ber chu an party-a mi pawimawhte appointment pek a nih thutea sawi bawk.

Inkhawmah hian AMC Ward-VI by-election neih tura Congress leh MNF candidate inṭâwm Lalrinfeli pawhin thu sawiin, a pasal hmawchhawpte chhunzawm tura Congress leh MNF-in an sawm vanga candidate ni ta a nih thu a sawi a, "Ka insit hle. Hun lo kal zel turah erawh din chhunzawm zel ka tum lem lo a, ka ngaihtuahnaah pawh a awm lo a ni," a ti.