Sik leh sa chungchang inzirtir

Department of Science & Technology - National Council for Science & Technology Communication (DST-NCSTC) leh Mizoram University chuan August 5-9 chhung khan Serchhip district-ah sik leh sa inthlak danglam nasain khawvel a nghawng dan inzirtirna leh lemziak hmanga entirna an buatsaih.

'Towards a climate resilient society - Sensitization of climate change to the society through the intervention of visual art in Mizoram, India' tih thupui hmanga sik leh sa inthlak chungchang zirhona hi Chhiahtlang High School, Keiṭum High School leh Serchhip High School-ah buatsaih a ni a; Mizoram University, Mizoram State Biodiversity Board leh Serchhip College-a mithiamte'n thil pawimawhte an zirtir a ni.

Inzirtirna pual hian nimin khan Serchhip College-ah Art Workshop buatsaih a ni a, H/S zirlaite'n climate change kaihhnawih lem an ziahte an pho chhuak. Exhibition-ah hian H/S zirlaite kutchhuak 43 leh Serchhip College Art Club member-te kutchhuak 11 phochhuah a ni.

He project hnuaiah hian district palia H/S ṭhenkhatah inzirtirna hun hman tur a ni a; project-in a ken tel visual art hmanga sik leh sa danglam zel phochhuah chu Mizoram Academy of Arts, Aizawla zirtirtute'n an zirtir ṭhin.