Mizoram leh Assam aiawhte an inbia; Ramri-ah harsatna siam loh ṭha an ti

Home minister K Sapdanga kaihhruai Mizoram sorkar aiawhte leh Assam Border Protection and Development minister Atul Bora kaihhruai leh a hote chu nimin tlai khan State Guest House, Aizawlah an inbia a; ramri-ah harsatna siam loh ṭha an ti ve ve.

Mizoram leh Assam chief minister-te inbiak tawhna bawhzuia inbiakna kaihruaitu Home minister K Sapdanga chuan, state pahnih chief minister-te ramri chungchangah February 19, 2024 khan Guwahati-ah an lo inbiak tawh thu a sawi a, "Tun hmaa sorkar lo awm tawhte pawhin ramri buai chingfel turin theihtawp an lo chhuah tawh ṭhin. Mizoram sorkar chuan sorkar lo awm tawhte'n ramri chingfel tura hma an lo laknate a chhunzawm zel dawn," a ti.

K Sapdanga chuan, ramri chinfel a nih theih nan theihtawp chhuahin hmalak a ni tawh ṭhin tih hmuh theih a ni tih sawiin, "State pahnihte'n ramri chinfel a nih theih nan theihtawp an chhuah. Inremna a awm theihna kawng thui zawka zawh zel tum a ni," a ti a, inbiakna a tam thei ang neih a nih chuan ramria buaina awm chinfel theih a nih ngei an rin thu a sawi.

Border Protection and Development minister Atul Bora chuan, Mizoramin Assam sorkar aiawhte an lo lawm danah a lawm thu a sawi a, "July 2021-a ramria buaina a chhuah hnu aṭangin ramri buaina chingfel turin theihtawp chhuah nghal a ni. Minister level-in hmaichhana inbiak ṭhin a nih bakah, video conferencing kaltlangin ramri chungchang sawiho ṭhin a ni," a ti.

Atul Bora chuan, inbiakna chuan awmzia a nei ngeia a rin thu sawiin, "State pahnih CM-te'n state pahnih inṭhian ṭhat an duh. Hun rei tak chhung ramria buaina awm chinfel a nih theihna tura rawn kal kan ni. Inbiakna hian ramri chinfel a nih theihna turah awmze thui tak a nei ngeiin ka ring," a ti a; ramri chinfelna tura Mizoram inpeknaah a lawm thu a sawi.

Vanglaini palaiin ramri china state pahnih ngaihdan a inan loh chungchang a zawhna chhangin minister pahnihte chuan, "Tun ṭum chu political level talk a ni a, ramri chinfel a nih theih nan hian official level-te pawh an la inbe chho zel dawn. Technical thil chu official level-ahte an la sawiho ang. Tun ṭumah chuan technical thil kan sawi lo a, inremna a awm theih dan tur kan ngaihtuah," an ti.

Inbiaknaah hian joint statement siam a ni a, state pahnih ve vete'n an pawm hnuah minister pahnihte'n thuthar thehdarhtute an kawm a, thuchhuah inṭawm an neihte an chhiar chhuak a ni.

K Sapdanga hi Revenue minister B Lalchhanzova, Home secretary Vanlalmawia leh official dangte'n an ṭawiawm a; Atul Bora chu Border Protection and Development Secretary hoin official eng emaw zatin an ṭawiawm a ni.