Sum neih loh vangin MNF sorkar a mangang - BJP President

BJP, Mizoram chuan nimin khan kumin atana an pisa an khâr a, khàrna inkhawmah an president Vanlalhmuaka chuan, MNF sorkar chu sum neih loh vanga mangangah a puh.

Vanlalhmuaka chuan, tun hnaiah BJP hruaitu Mizoram enkawltuin MNF chu BJP puihna avangin kum 2018 inthlanah an tlin thu a sawi thu leh, MNF chu NEDA-ah an tel avanga sorkar laipuiin Mizoram duhsak angin Mizorama minister ṭhenkhatin an ngaih thu sawiin, "Sorkar laipuiin MNF a duhsak bik a ni lo, Congress pawh sorkar se, hetiang tho hian an rawn ti dawn. A chhan chu Covid-19 hripui léng avangin Central khuan mipui rilṭáma an awm a phal lo," a ti.

MNF kaihhruai sorkar chu sum an neih loh avangin an mangang tih sawiin Vanlalhmuaka chuan, "Sports Minister-in Chief Minister lungphùm a phùmtir reng thung. Hei hi inbumna a ni thei ang em kan ti hial. A chhan chu, Union Tribal Affairs Minister chuan central project zawng zawng chu Covid-19 avangin pek chhuah a nih dawn rih loh thu a sawi. Mipui bum nana lung phùm mai an nih hmel," a ti a; lung phùmah an tàwp mai ang tih a hlauhawm thu a sawi.