Assam leh Mizoram ramri buaiah: Amit Shah-a'n theihtawp chhuah A tum thu Chief Minister a hrilh

CM Zoramthanga chuan, Assam-a cheng mi ṭhenkhatin Mizoram chhung hmun pathumah buaina an siam chu hriatthiam harsa a tih thu a sawi a; Assam state-a inthlanpui awm tur thlira politician ṭhenkhatin mipui rilru hruai kâwia buaina an rawn siamna nia a ngaih thu Union Home Minister a hrilh.

Mizoram leh Assam inkal­pawh­na kawngpui Assam state chhunga dan a nih avangin Mizoram mipui ni tin mamawh châwk luhna an chhu chat rih tih sawiin, Zoramthanga chuan, mipuiin ei leh bara harsatna an tawh loh nan Tripura leh Manipur bakah, thenawm ram Bangladesh leh Myanmar aṭangin mamawh lak luh dan Mizoramin a zawn mai a ngaih tur thu Amit Shah hnenah a sawi a ni.

Home minister Amit Shah chuan, Tripura, Manipur, Bangladesh leh Myanmar aṭanga mipui mamawh lak luh dan tur dap ngai lo turin state ramria harsatna chu sutkian a nih thuai tur thu CM Zoramthanga a hrilh a, "Boruak ṭha zawk a awm thuai ka beisei," a ti.

Assam leh Mizoram ramri buai chungchangah hian DoNER minister Jitendra Singh, Assam chief minister Sarbananda Sonawal leh Union Home secretary Ajay Bhalla pawhin Chief Minister hi an rawn bia a ni.

Assam CM Sarbananda Sonowal chuan, state pahnih inkara harsatna thleng chu pawi a tih thu CM Zoramthanga hrilhin, "Assam aṭanga ei leh bar lâk luh kawngah Mizoramin harsatna an tawh lohna turin theihtawp chhuah a ni ang," a ti.

Chief Minister hi Assam Home minister Himanta Biswa Sarma nen pawh an inbe tawh a, boruak muanawm awm thuai se an duh thu an sawi dun a ni.

He thu ziah lai thleng hian Assam lam aṭangin bungraw phur lirtheite Mizoramah an la lut lo a, mimal lirtheite erawh an rawn lut nual tawh thung. Ramriah mipui pungkhawm an awm tawh lo a, inthiarna hmun siamin nimin khan tlawmngai pawlte an hnatlang. Assam lam pawhin thâwm an nei tawh rih lo.