Assam-a Zo hnahthlakte Mizorama Awm dilna memorandum thehlut

Assam awpna hnuaia awm Zo hnahthlak péng hrang hrang - Chorei, Hrángkhawl, Molsom, Ranglong, Sakachep leh Kaipeng ten Mizoram sorkar awpna hnuaia awm an duhna memorandum chu MZP hruaitute leh Assam-a awm mek Thangram Indigenous Peoples Movement (TIPM) hruaitute chuan tun hnai khan Prime Minister leh Union Home Minister office-ah an thehlut.

MZP leh TIPM hruaitute hi Union Home Secretary-in a lo dawngsawng a, Covid-19 avangin Prime Minister leh Home Minister erawh an hmu thei lo a ni.

MZP thuchhuah tarlan danin, Home Secretary chuan memorandum chu a ṭul anga bawhzui zel a nih tur thu a sawi a, "Tun maia tihhlawhtlin theih chi a ni em tih zir chian hmasak a ngai dawn. Thangram huam chhung sq. mile 180 huam chhunga Zo hnahthlak chêngte tan an mamawh ang hmasawnna erawh chu pek nghal theih a ni," a ti.

TIPM hruaitute chuan, hmasawnna an duh rualin, an duh ber a ni lo a, an duh ber chu an awmna báwr vel Mizoram state chhunga rìn luh a, Mizoram sorkar awpna hnuaia awm a nih thu Union Home Secretary an hrilh.

MZP leh TIPM-te chuan an memorandum-ah, Karimganj district chhunga chêng Zo hnahthlak hnam péng hrang hrangte'n Assam sorkar hnuaiah kawng hrang hranga ensan leh endawng an tawh ṭhin thu te, Singla valley leh Langkaih valley chu Zo fa thlangtla hmasate luah ram a nih avangin Zo fate ta a nih thute an tarlang tel a ni.