Ramri chungchangah Mizoram leh Assam sorkar aiawhte ṭum riat an inbe tawh

Ramri chungchangah Mizoram leh Assam sorkar aiawhte ṭum riat an inbe tawh; chung zinga ṭum li chu sorkar official-te inbiakna (official level a ni a, ṭum li dang chu minister-te inbiakna (political level) a ni thung.

Hriat theih chinah Mizoram leh Assam sorkar aiawhte inbiak hmasak ber chu February 15, 1994-ah a ni a, hemi ṭum hian Guwahati-ah state pahnih chief secretary-te an inbia. Kum 20 hnu, September 24, 2014 khan Home additional secretary Lalbiakzama kaihhruai Mizoram sorkar aiawhte leh Assam sorkar aiawhte Aizawlah an inbe leh a ni.

Kum li dáwn inbiak a nih loh hnuah Ministry of Home Affairs (MHA) bultumin Mizoram leh Assam chief secretary-te New Delhi-ah an inbe leh a, hmasawnna lian tham sawi tur a awm lo.

July 26, 2021-a Mizoram Police leh Assam Police-te Vairengte daia an inkah hnuah MHA Secretary kaihhruaiin state pahnih chief secretary leh DGP ve ve te chu New Delhi-ah an inbia a, state pahnih inkarah remna a awm theih dan tur sawiho a ni.

Political level-a inbiakna hmasa ber chu August 5, 2021 khan Aizawlah neih a ni a; Assam Border Proctection & Develoment minister Atul Bora kaihhruai Assam team leh Home minister Lalchamliana kaihhruai Mizoram team-te Aijal Club-ah an inbia.

August 9, 2022 khan Atul Bora kaihhruai Assam team-te Aizawlah rawn zin lehin, Lalchamliana kaihhruai Mizoram team nen an inbe leh a; chumi hnuah Lalchamliana kaihhruai Mizoram team chu November 17, 2022 khan Guwahati-ah an zin ve thung a, ramri chinfel tumin an inbe leh a ni.

Inbiakna hnuhnung ber chu August 9, 2024 khan neih a ni a; Home minister K Sapdanga kaihhruai Mizoram team leh Atul Bora kaihhruai Assam team-te State Guest House-ah an inbia. Political level-a ṭum danga an inbiak ṭuma an tih ang thoin thuchhuah inṭawm siam a ni.

Mizoram leh Assam sorkar official-te chu political level-a inbiakna neih leh a nih hmain an inbe dawn a, political level chu March 31, 2025 ral hmain Guwahati-ah an inbe leh ang.