MNF ṭhalaite'n Phuldungsei an tlawh; Ration card paihsakte thlavang an hauh

Mizo National Youth Front (MNYF) hruaitute chuan August 10, Inrinni khan Mizorama ration card-a awm ṭhin mi 85 paihna khua Phuldungsei an tlawh a, khawtlang hruaitute an kâwm.

MNYF vice president Lalnunmawia Pautu chuan, ZPM sorkarin Mizorama Aadhaar card nena ration card thlun zawm vek tawh Phuldungsei khaw mi 85 chu Mizorama ration card aṭanga paih an nih thu a sawi a, "Mizoram sorkar hi a demawm kan ti a, Mizo hnam rilru an put lohzia lan chianna a ni. Khaw dintu Hrangvunga Sailo, Mizoram sorkar lo awm tawh te, Mizo mipui leh Phuldungsei khua bakah Mizo hnam pawikhawihna a ni," a ti.

Ration card titawpsak chu an lâk thutak thu sawiin Lalnunmawia Pautu chuan, "Hetiang thil a thleng hi kan la thutak a, chhui chiangin a ṭul ang zelin hma kan la dawn. Information kan neih belh zel," a ti a; Mizoram sorkarin ngaihdam dil loa chhuanlam an siam zel a nih chuan chiang zawkin hnam pawi an khawih dan an la puan chhuah tur thu a sawi.

MNYF tarlan danin, Phuldungsei khuaa mi 85-te ration card aṭanga paih chungchang chu bialtu MLA Robert Romawia Royte, MNYF president-in chief minister Lalduhoma hmaichhanah a sawipui tawh a, ration card tihtawpsakte hming pawh a pe nghal. Ration Cards Management System chungchang pawh mithiamte a sawipui tawh a ni.

MNYF hriat danin, Phuldungseia mi 85 chu Mizorama Aadhaar card thlun zawm ration card nei vek an ni a, April leh May 2024-ah an ration card-te an hriat loha paih a ni.

MNF Ṭhalai chuan, Phuldungsei mite chu Tripura sorkarin an state-a Aadhaar nena an ration card thlun zawm a tum a, mahse, Mizorama thlun zawm tawh a nih avangin an ti thei lo niin an tarlang a, "Mizoram sorkarin a paih veleh Tripura sorkarin a lo thlun zawm vat a, Mizoram sorkar chuan a thlun zawm thar leh mai thei tawh lo a ni," an ti.