Phuldungsei khaw mite ration card tihtawpsak chungchang an sawifiah

ZPM party chuan thuchhuah siamin, Phuldungsei khuaa mi ṭhen­khat ration card tih­tawp chungchang an sawifiah a, mi pakhat hming ration card pahnih­ah a chuan theih loh vang a nih thu an tarlang.

Supply department hotute chuan, Mizoram ration card an duh zawk a nih chuan Tripura ration card titawp se, siamsak a harsat loh thu an sawi.

ZPM sawifiah danin, sorkar laipuiin End to End Computerisation of Targeted Public Distri­bution System a kalpui a, ration card management system (RCMS) chu Aadhaar card hmanga finfiah a ngaih avangin Aadhaar pakhat chu ration card pakhatah chauh chhin­chhiah theih a ni a, ration card pahnihah awm theih a ni lo.

Phuldungsei khuaa mi ṭhenkhat ration card chu Tripura sorkar hnuaiah chhinchhiah (register) tawh a nih avangin Mizoram sorkar hnuaia RCMS-ah chhinchhiah theih a ni lo a; Tripura ration card-ah an awm tawh avangin Mizoram ration card-ah an awm thei tawh lo.

Thu dawn danin, Phuldungsei hi Mizoram leh Tripura inrìnaa awm a ni a, tun hnai khan chhungkaw 85-te ration card chu Mizoram sorkar­in a tihtawpsak a, hei vang hian August 9, 2024 khan an khuaah lungawi lohna an lantir a ni.

Food, Civil Supplies & Consumer Affairs department hotute chuan Vanglaini palai zawhna chhangin, India ramah ration card pahnih neih emaw, ration card pahniha hming chuantir phal a nih loh thu leh, Phuldungsei khaw mi, ration card aṭanga paihte chu ration card pahniha an awm vang a nih thu an sawi.

FCSCA hotute chuan, Phuldungsei khaw mite'n Mizoram ration card an duh zawk a nih chuan Tripura state-a an ration card titawp se, Mizoramah ration card siamsak theih reng an nih thu leh thil harsa a nih loh thu an sawi bawk.