STAM-in an din champha an lawm

Science Teachers Association Mizoram (STAM) chuan August 9, 2024 tlai khan Aijal Club-ah an din champha vawi 38-na an lawm a, Education minister Dr Vanlalthlana, STAM patron ni bawkin a hmanpui.

Dr Vanlalthlana chuan, science leh mathematics zirtirtu an la indaih tâwk loh thu sawiin, "Sikul tina science leh mathematics zirtirtu data kan nei tawh a, hei hian zirtirtu siam remah nasa takin min pui dawn a ni," a ti a; MLA fund aṭangin science zir duh, suma harsa zirlai pahnihte college admission STAM kaltlangin a peksak tur thu a sawi. Minister hian STAM Educational Foundation atan Rs 5,000 a pe bawk.

Higher & Technical Education Minister chuan, NIT, Mizoram campus, Lengpuia dinna tura thil tihfel ngai la awmte bawhzui zel a nih thu a sawi a; Lunglei Pukpui rama Mizoram Engineering College din tur chu tihpuitlin a nih theih nan sorkar laipuiah a thlen tawh thu te, sikul hrang hrangah Atal Tinkering Laboratory din belh zel a nih theih nan hmalak mek a nih thute a sawi bawk.

STAM din champha lawmna hi an president Dr R Lalengmawia'n a kaihruai a, general secretary Zothanliana'n STAM dinhmun leh hmalakna tlangpui a sawi bakah, STAM president hmasa ber Dr H Lalthlangliana'n thu a sawi.