Thla khat chhunga lirthei khalhtute pawisa chawi zat cheng nuai 10.66

July 2024 chhung khan Aizawl district-a Transport department enforcement staff-te'n lirthei khalhtu dan bawhchhia an man aṭanga sum an chawitir tling khawm chu cheng nuai 10.66 a tling.

Aizawl District Transport Officer office-in a chhinchhiah danin, July thla chhung khan lirthei 2,099 an enfiah a, dan bawhchhia 271 an man. Man zingah hian ṭum dang ang bawkin bungraw phur lirthei tê chi - light goods vehicle 100 awmin a tam ber a, maxicab 80 manin man tam ber dawttu an ni. Ṭum danga an man ngai loh excavator pathum an man tel.

Lirthei dan bawhchhia an mante chu chhiah pe lo leh insurance thite a ni tlangpui a; lirthei dan bawhchhiate sum chawi chu a vaiin sorkar sum báwmah chhûn luh zel a ni.

Motor vehicle inspector-te chuan, lirthei khalh laiin a remchang hle a nih loh chuan hmaa mite lehpelh (overtake) chíng lo turin lirthei khalhtute an ngen a ni.