Union RD minister Pashwan-a'n sorkar laipui hmalaknate a enfiah

Sorkar laipuia Rural Development minister of state Kamlesh Paswan chuan August 10, Inrinni khan Aibawk leh Muallungthu a tlawh a; sorkar laipuia thingtlang mite ṭanpuina scheme hnuaia hmalaknate a enfiah bakah, sorkar leh khawtlang hruaitute a kâwm.

Aibawk BDO pisa a tlawhnaah Kamlesh Paswan chuan, prime minister Narendra Modi-a'n India hmarchhak state-te kawng hrang hranga tihhmasawn a tum thu a sawi a, "Kawng hrang hrangin hmasawnna rahbi tuk mek a ni a, kei pawhin ka ministry chan hnuaia hmasawnna hnathawh mekte dinhmun leh eng harsatna nge an tawh tihte hre turin ka rawn tlawh che u a ni," a ti.

RD Minister chuan, Mizorama inkalpawhnain hma a sâwn zel tih sawiin, "Hmun kilkhawr zawkte tlawhpawh a nih theih nan sorkarin hma a la zel dawn. Mizorama rêl lo lut tur hian hmasawnna tam tak a thlen dawn a ni," a ti a; PMAY-G hnuaiah Mizorama chhungkaw 30,000 chuangin ṭanpuina an dawng thei chu lawmawm a tih thu a sawi bawk.

Kamlesh Pashwan chuan, Aibawk RD Block hnuaia Pradhan Mantri Awaas Yojana-Gramin (PMAY-G), Pradhan Mantri Gram Sadak Yojana (PMGSY), MGNREGA, Deen Dhayal Upadhaya Grameen Kaushalaya Yojana (DDU-GKY), MzSRLM etc. viltu leh buaipuitu official-te kâwmin, an hmalaknate a zawtfiah a; ṭanpuina dawngtute chu harsatna an neihte a zawt bawk.

Union RD Minister hian August 10 khan Aizawl a rawn thleng a, nimin khan Mizoram a chhuahsan leh a ni.