ZPM-in CBI chhuitir tura an ngenna ACB report luh hunah ngaihtuah dawn

ZPM Legal Department-in Lokayukta-a complaint thehluh tawh pathum Central Bureau of Investigation (CBI) chhuitir tura an ngenna chu Anti Corruption Bureau (ACB)-in an chhuina report an thehluh hunah ngaihtuah a ni dawn.

Vanglaini palai zawhna chhangin ZPM Legal Department hotute chuan, CBI chhuitir tura ngenna an thehluh hnuah Lokayukta hotute an be leh tawh tih an sawi a, "CBI chhuitir tura kan duhte hi ACB-in an chhui lai mek an nih avangin an chhuina report an thehluh hunah Lokayukta chuan CBI chhuitir leh chhuitir loh tur a ngaihtuah dawn niin kan hria. CBI chhuitir tura kan duhte hi mipui nghawng thil tak tak vek a nih avangin chhuitir ngei se kan duh," an ti.

Thubuai pathum CBI chhuitir an duh zinga pakhat, Lengpui Airport chei ṭhat chungchang phei chu ACB-te'n an chhui zawh tâk chief minister hlui Zoramthanga thiam lohna an hmuh lohna a nih thu sawiin ZPM Legal department hotute chuan, "Lokayukta chuan chhui ṭha leh turin ACB-te a hriattir nghe nghe," an ti a, chhui ṭhat leh mek a nih thu an sawi.

Tarlan tawh angin, ZPM Legal Department hian July 16, 2024 khan Lokayukta-a complaint thehluh tawh ṭhenkhat chu a kal muang lutuka an ngaih avangin CBI chhuitir tura ngenna Lokayukta chairman Lalmalsawma hnenah an thehlut.

ZPM Legal Department-in CBI chhuitir tura ngenna an thehluhnate chu - Chaltlang-Durtlang ropeway leh Sakawrhmuituai tlang skywalk chungchang te, NABARD sum hmanga Mizorama sikul eng emaw zat thawm ṭhat chungchang leh, Lengpui Airport chei ṭhat chungchangte a ni.