MNF sorkarah dan loa CM thil tih vangin buhfai qtl 1-ah Rs 375 chawi belh a ni - ZPM Party

ZPM party chuan, sorkara buhfai pe (supply)-tu tur chu SPAB kaltlanga thlan a nih thu leh, MNF sorkar laiin Chief Minister-in dan loa buhfai supply-na man a tihsànsak avangin sorkarin buhfai quintal khatah Rs 375 a chawi belh thu an tarlang.

ZPM chuan, ZPM kaihhruai sorkarah politician inrawlh lohna State Purchasing Advisory Board (SPAB) kaltlanga Chief Secretary hoa buhfai supply-tu thlan a nih thu an tarlang a, "Kalphung thar sorkar rah chhuah niin kan hria a, lawmawm kan ti hle a ni," an ti.

Sorkar hmasa, MNF sorkarah May 2, 2023 khan SPAB kaltlang loin Chief Minister thu hmuin dan loin buhfai supply-na man uchuak taka tihsan a nia sawiin ZPM chuan, "Buhfai quintal-ah Rs 3,025 aṭangin Rs 3,400-ah tihsan a ni a, CM-in a duhsak zawngte dan loa buhfai supply-na man a tihsànsak avanga sorkarin sum a chawi belhna chu quintal-ah Rs 375 lai a ni," tiin an tarlang.

ZPM chuan, MNF MLA-te'n buhfai man tihsan vanga sorkar an dem chu an dem lêt a, "MNF sorkar hnuaiah buhfai man tihsanna tur hian committee din tawh niin, Deputy CM kaihhruaina hnuaiah Committee on Matters Relating to Non-NFSA Act 2013 (Above Proverty Line) Beneficiaries and Revision of Issue Price of Non NFSA Rice' din a ni. He committee ni 17.1.2022-a ṭhukhawm chuan card var ration buhfai man tihpun an lo pass daih tawh a, meeting minute pawh en theih a ni," an ti.

Thu belhchian dâwl lo hmanga inpuh chu politics kalphung hlui a nih avangin mipuiin an ning nia sawiin ZPM chuan, "Kalphung thar, mipui sorkar a lo pian phah a ni," an ti a, enptu party-te chu thu dik tâwk lo hmanga mipui rilru kawih her tumna bànsan a, thil ṭha tih kawnga inelpui atan an sáwm a ni.