Delhi-a I-Day ah Mizo tel dawn

New Delhi-a Independence Day lawmnaa NSS volunteer-a ṭang tur Johnson College zirlai pahnih Christina Hmangaihzuali leh FB Imanuel Lalvenhima, J Thankima College zirlai pahnih Emanuel Rochanhlui leh Samuel Muanlalsiama te chuan nimin khan Delhi an pan. Tun ṭum hi Delhi-a Independence Day lawmnaa Mizoram aṭanga NSS volunteer an tel ṭum khatna tur a ni.

Aspirational Block hnuaia sector hrang hranga hmalaknaa mi taima leh hlawhtling thlan zinga mi H Vanropari w/o Lalbuatsaiha, Pâwlráng pawh Delhi-a Independence Day lawmnaah special guest a ni dawn.

Aspirational Block hnuaiah hian - health & nutrition, agriculture & allied, social development, basic infrastructure leh education-te a awm a; Mizoram State Rural Livelihoods Mission (MZSLRM)-in bawhzuiin, kut hnathawktute'n loan lain hma an la ṭhin.

H Vanropari hian fu huan ṭin thum hmun neiin, kurtai a siam ṭhin a, fu vawi khat herah kurtai kg. 30-40 vel a siam chhuak ṭhin. Mizorama Aspirational Block pathum - Lungsen, Reiek leh Ngopa Block aṭangin mi taima leh hlawhtling mi pathum thlan a ni a, Saitual district-a Ngopa Block aṭangin H Vanropari thlan a ni.