Thinghlun ramah inhmachhawn

Nimin khan Assam mite'n Thinghlun ramah chawlhbûk sak an tum a, Zaite (Thinghlun piah) khuaa Mizote chu Assam mite'n an vau nia sawi a ni bawk. Mizoram lam mite leh Assam lam mite hi inhmachhawn mah se, buaina a chhuak zui lo nia thu dawn a ni.

Thinghlun ramah Assam mite'n chawlhbûk sak an tum avang hian MZP hruaitute chuan nimin khan Thinghlun an pan nghal a; Thinghlun khawtlang hruaitute nen inkâwmin, ramri vên kawngah theihtawp chhuaha a ṭul anga thawhho zel an rél.

An inkawm zawhah ramri vên hnatlang an nei chhunzawm nghal a, mi 300 chuang an thawk chhuak. Assam police-te'n thlám an hàl tak bula Assam mite'n bûk sak an tumna hmun pawh an tlawh a, buaina erawh a thleng zui lo.

Assam police eng emaw zat chu officer hoin nimin tlai dar 5 vel khan an kal leh a, buaina erawh a thleng lo. Assam police-te hian thlám leh a chhehvel chu an en kual a, thlám awmna chu an ngaimawh thu an sawi. Rei tak awm loin an lêt leh a ni.

MZP chuan, Zaite khaw mite chu Assam hoin village council pek an tiam nia sawiin, "Tihluihna hmangin Zaite khuaa Mizote chu bûk sakna hmun sàm faitir an ni a, an sâm fai lo a nih chuan Assam aṭanga hamṭhatna an dawn zawng zawng tihtawp vekah an vau tih hriat a ni," an ti.

Assam mite'n Zaite khuaa Mizote an vau leh hmanruaa hman an tum chu pawi an tih thu sawiin MZP chuan, "Boruak a sosang hman hle. Mamit DC leh SP-te'n Mizo tlangval pungkhawmte chu thu leh hla ngaichâng rih tura an ngen angin thuneitute ngaihchân a nih hnuah boruak a ziaawm ta a ni," an ti a; bûk sak tumtute leh Assam police-te pawh an tawlh kîr tâk thu an tarlang.

Thu dawn danin, Zaite khaw mite hi Assam electoral roll-ah an awm a, khaw mi zinga a tam zawk chu Mizo an ni.