KHAWTHLIR

SU building hawng

J Thankima College zirlaite'n Students' Union (SU) office atana an sak RCC building chu August 9, 2024 khan an principal Prof. JV Nunchunga'n a hawng. SU building hi kum 2021-22 aṭangin zirlaite'n admission an tih ruala Rs 150-200 an thawh leh kum laklawha Rs 10 an thawh ṭhin tling khawm Rs 15,82,232 hmanga sak a ni. Bialtu MLA Vanlalhlana'n MLA fund aṭangin a panna step siamna tur Rs 2,00,000 a pe bawk.

Larsap leh minister

August 10, Inrinni zan khan Raj Bhavan-ah Governor Dr Hari Babu Kambhampati leh Union Rural Development minister of state Kamlesh Paswan an inkâwm. Thingtlang mite'n Rural Development department hnuaia programme hrang hrang leh hmalakna an ṭangkaipui dante leh thil pawimawh hrang hrang an sawi dun a ni.

Thisen pe

August 10, Inrinni khan KṬP, Tuikual North Branch chuan an kohhran Hall-ah ZMC tan thisen unit 43 an pe a, petute mipa 32 leh hmeichhia 11 an ni. Adventist Youth Federation (AYF) Aizawl West Circle pawhin Chawlhhmun community hall-ah Synod Hospital tan thisen unit 57 an pe a, petute mipa 50 leh hmeichhia pasarih an ni.

EFCI seminar

Evangelical Free Church of India (EFCI) hnuaia Central Kristian Hmeichhe Pawl chuan August 7-8, 2024 chhung khan EFCI kohhrana pastor leh thawktu nupuite pualin Tourist Complex, Berawtlangah 'Rawngbawltu nupuite seminar' an buatsaih. Mizoram, Tripura leh Manipur aṭangin mi 70 vel an tel a, mi 46 an riak lut. Resource person-te chu Rev. Lalchawlthang Ṭhiek leh a nupui Lienkhawtling Ṭhiek an ni.

Kawng one way

Traffic SP Stephen Lalrinawma chuan Luangmual Chhangurkawn leh Zotlang Presbyterian Kohhran biak-in panna (via mandir) kawng chu zing dar 8 aṭanga chawhma dar 10:30 leh tlai dar 4 aṭanga zan dar 6 inkarah one way tur a nih thu a tarlang. One way chhungin Chhangurkawn aṭangin LMV leh a aia lian lirtheite chho zawnga tlan phal a ni lo.