Vairengte tlawh rih lo turin ngen

Kolasib DC Dr H Lalthlangliana chuan tun hnai khan thuchhuah siamin, sorkarin kal tura a tihte ni lo civil mite chu Vairengte tlawh rih loh turin a ngen.

Vairengte leh Lailapur inkara buaina thleng chu boruak a pangngai leh ṭan mek tih tarlangin Kolasib DC chuan, "Hetianga zâwi zâwia boruak pangngai chho thei a nih laiin, mi ṭhenkhatin social media-ah thu dik tâwk lo vawrh darhin, mipui inpun khawm záwnga thil thehdarh a tam hle. Buaina lian zawk chawk chhuak thei, mipui himna tichhe thei a nih avangin social media-ah thu dik tâwk lo thehdarh lo turin mi tin kan ngen a ni. Muanna boruak tichhe thei zawnga thu dik lo thehdarhtute chu chhui chhuah a, a ṭul anga hrem an ni ang," a ti.

Kolasib Bawrhsap chuan, buaina thlenna hmun Vairengte chu pan khawm loh ni se an duh tih sawiin, "Thil ṭul ang ang sorkarin a ruahman a, ṭul loa mipui punkhawmna hian mipui himna a tichhe thei a ni. Sorkarin ruahmanna a siama kal tura tihte chauh lo chu civil mi tu mahin Vairengte tlawh rih lo turin kan inngen a ni," a ti a; mipui punkhawm chu Mizo hming tichhe zawnga chêt palh phah theihna a nih thu a tarlang.