Contract hna a hmu ngaiin an hmuh tluk tluk loh nan hma kan la mek - CM
Chief minister Lalduhoma chu nimin khan a pisaah Synod Social Front hruaitute'n an kâwm a, Synod-in eirukna do a lo relte bawhzuiin, sorkara thlen tur chi an neihte an thlen. CM chuan, contract hnate a hmu ngaiin an hmuh tluk tluk loh nan hma an lak mek thu a sawi.
CM Lalduhoma hian eirukna tibo tur leh eiruk chíngte chunga dan anga hmalak a nih theih nan Lokayukta an thuam chak chhoh mek dan te, criminal law tharin a phût ang thlapa CBI hnena general consent an pek thu leh, restricted tender chu dan ang thlapa kalpui an tum thute Synod Social Front hruaitute a lo hrilh a ni.
Lalduhoma chuan, contract hralh chhàwn tihbo an tum thu leh tunah chuan hralh chhâwng sawi tur pawh an awm rih loa an hriat thu a sawi a, "Contract hi a hmu ngaiin an hmu tluk tluk thei a, heng thil fel tâwk lo awm theite tibo tur hian hma pawh kan la mek. Sorkar chu kohhrante thuràwn leh zilhnate ngaithla turin a inhawng em em a, rawn inthlahrung suh u," a ti.
Revised estimate chu hna zawh hun (project date of completion) pawhsei nen a kal kawp duh tih sawiin Lalduhoma chuan, "Kan hunah hian heng thil pahnih hi tihbo kan tum. A ûm zuitu tur mipui huapzo Project Monitoring Committee kan din a, team paliah insem darhin endik hna an kalpui mek," a ti a; Project Monitoring Committee-in chipchiar leh uluk taka an endik hnua an remtihsak hnenah chauh project cost revised leh date of completion pawhsei an phal dawn thu a sawi.
Synod Social Front hruaitute chuan, kohhranin sorkar chu ṭha taka thawhpui an duh thu an sawi a, "Mipui sorkar tih ri ringawt pawh hi a mawi. Chutihlaiin, sorkar kalphungah sawisel tur a awm chuan kan sawi hreh dawn lo. Vawiinah hian Synod-in eirukna (corruption) do a lo relte bawhzuiin sorkara thlen tur chi kan neihte kan rawn thlen a ni," an ti a; eirukna do tura kohhran huang chhunga hmalak an tum dante an sawi bawk.
SYNOD SOCIAL FRONT THU THLENTE
* Lokayukta tihchak
* Restricted tender chu loh theih lohah chauh kalpui
* Project cost ennawn (revised) tihbo
* Contract hralh chhawn tihbo