Governor-in sum dinhmun avangin hydel project tênau siam ṭha a ti lo
Governor chuan, Mizorama hydel project tenau siam chu tih chi-ah a ngaih loh thu a sawi. Power & Electricity (PE) minister F Rodingliana chuan, sorkar department lian zingah kawlphetha hmang na deuhte an awm thu sawiin, "Heng aṭang hian a hunah electric current chhit man a lut hleithei ṭhin lo," a ti.
Governor Dr Hari Babu Kambhampati hoin nimin khan Raj Bhavan-ah PE Minister leh department hotu te, NEEPCO hotute leh Household Solar Electricity thlun hna thawktu company aiawhte'n Mizorama kawlphetha lama hmalakna leh hmachhawpte an sawiho a ni.
Larsap chuan, kawlphetha siam chhuah leh intodelh chu Mizoram tana tihhlawhtlin hmasak ngai a nih thu te, hydel project tenau siamna atan sum tam tak Mizoramin a hmang ṭhin chu tuna neih tawh sa aṭangin a hlâwk loh thu te, loan lian tham tak lâka hydel project tenau siam chu Mizoram sum dinhmun ngaihtuahin tih chi-ah a ngaih loh thute a sawi.
Mizoram sorkar sum sên ngai loa company lian zawkte hydro project lian siam tura koh luh ṭha a tih thu sawiin Larsap chuan, "Kan lui luangte’n kawlphetha an siam theih zat dik tak chhût chhuah a ṭul a, power plant siamna atana bungraw lian tham tak tak la lut turin Aizawl-Vairengte inkar kawngpui hi fourlane-ah a rang lama siamtir a ngai," a ti.
PE Minister chuan electric bill chungchang sawiin, "Sorkar department lian deuh, kawlphetha hmang na deuhte an awm a, he'ng aṭang hian a hunah electric current chhit man a lut hleithei ṭhin lo a, harsatna a awm ṭhin. Khaw ṭhenkhatah thawktute indaih lohna avangin current chhit man bill a lut ṭha vak lo bawk," a ti.
F Rodingliana chuan, Mizoramin kawlphetha intodelh project pahnih - Tuirini Small Hydel Project (megawatt 24) leh Revised Tuivai HEP (megawatt 150) siam chungchanga hmalakna kalpui tawh chinte a sawi a, "Tui luang chakna hmanga kawlphetha siam bakah, nizung chakna hmanga kawlphetha siam turin theihtawp chhuah a ni," a ti a; Mizoram hmun kilkhawr zawkah pawh solar power plant siam an tum thu te leh ruahman dante a sawi.
ṬHUTKHAWMA TARLANTE
▶ Mizoramah tui luang chakna hmangin kawlphetha MW 3,500 siam theih a ni.
▶ Kum khat chhungin Mizoramah ni 300 vel kawlphetha siamna atan ni êng hman tlak a awma chhût a ni.
▶ PE department chuan project lian tham 12 - hruipui thlun, electric ban lian chi (tower) leh sub-station siam hnate a kalpui mek.
▶ Solar project bikah MW 10 Grid Connected SPV Power Plant, Thenzawl chu NABARD loan cheng nuai 7,107 leh SMS cheng nuai 374 hmangin thawh mek a ni.
▶ PM-Surya Ghar: Multi Biji Yojana (Rooftop Solar Scheme) kalpui mek niin, rtspower.mizoram.gov.in leh pmsuryaghar.gov.in aṭanga dil theih a ni.
▶ Rooftop solar dilna 506 a awm mek a, sorkar pisaah rooftop solar kalpui mek a ni.
▶ Mizoramah kawlphetha siamna hydro generating station 15 a awm mek.
▶ Nizung chakna hmanga kawlphetha siamna stations 5 a awm mek a, a lian ber Vankal Solar Plant-in MW 20 a siam thei a, a bak chu MW 0.1-2 siam thei an ni.