Tripura aṭanga an inpaihtir hunah Mizoramah thun nghal an ni dawn - FCSCA Minister

Food, Civil Supplies & Consumer Affairs (FCSCA) minister B Lalchhanzova chuan, Mamit district chhunga Mizoram sorkar hnuaia ration card nei ṭhin, Tripura ration card nena an neih kawp avanga paih tâkte chu Tripura aṭanga an inpaihtir veleh Mizoramah thun nghal an nih tur thu a sawi.

B Lalchhanzova hian nimin khan a pisaah thuthar theh­darh­tute kâwmin, Mamit district-a Zomuantlang, Jampui leh Phul­dungsei khuaa Mizoram khua leh tui mi 85-te ration card link theih loha a awm thu a sawi a, "Mizoram sorkar chuan a ngai pawimawh. Heng zingah hian chhungkaw 50 leh chhungkaw pum ni loin mi 35 an tel. Mi 85-te hi kan mi leh sa an nih avangin Mizoram sorkar chuan manual-in ration card kan siamsak dawn," a ti.

Mi 85-te'n Tripura-a an ration card chu sorkarah pe let (surrender) se ṭha an tih thu sawiin Minister chuan, "Tripura-a an ration card an paihtir veleh Mizoramah ration card siamsak nghal an ni ang. Tripura aṭanga an inpaih phawt a ngai," a ti a; tun hmain ramria a awm ṭhenkhatte'n state pahnihah ration card nei kawp thei mah se, tunah chuan RCMS database vangin ration card neih kawp a theih tawh loh thu a sawi.

B Lalchhanzova chuan, ration card nei kawp zawn chhuah hna ngawrh taka thawh a nih thu sawiin, "RCMS database hian ration card nei kawpte a zawn chhuah tak avangin Tripura-a Aadhaar link telte kha Mizoram database-in a chhinchhiah thei lo a, hetiang hi a lo thleng ta a ni. Tripura-a ration card leh family member system-in a pawm theih lohte hi Mizorama awm leh an duh chuan engtik lai pawhin ration card kan siamsak thei," a ti.

Supply Minister chuan, rin thu deuha eng eng emaw sawi ṭhin chu ṭha lo an tih thu sawiin, "Ramria chengte hian ration card kher lohah pawh harsatna an tâwk ṭhin a, FCSCA department chuan a ngai pawimawh zel dawn. Department hrang hrang pawhin an ngai pawimawh zel ang," a ti a; sorkarin a ngai pawimawh tih hriaa chî-âi lo turin ramria chengte a chah.

Zawhna chhangin B Lalchhanzova chuan, Mizoram ration card aṭanga paih mi 85-te chungchang chu politics-a inbeihna atana hmang an awm a nih pawhin, rah ṭha a chhuahna tur a nih chuan a ṭha veka an ngaih thu a sawi bawk.