Ward VI-a kan candidate eptute'n do rawn thamah an ngai - K Sapdanga
Aizawl North-III bialtu MLA K Sapdanga, minister chuan nimin khan ZPM pisaah thu sawiin, a bial chhung AMC Ward-VI by-election awm turah eptu party lian pahnihte'n an candidate chu do rawn thamah an ngaih thu a sawi a; eptu party-te'n thu belhchian dâwl lo hmangin mipui rilru hruai kâwi an tum ṭhin thu a sawi bawk.
K Sapdanga chuan, AMC Ward-VI corporator John Zosangliana Ralte chu March 21, 2024-ah chatuan ram a pan avangin by-election neih a ngai tih a sawi a, "Pu John-a kha kan bial, Aizawl North -III chhunga corporator a ni a, mimal tak pawhin kan inhre ṭha a, mi nun tluang tak a ni," a ti a, John Zosangliana chu Ward-VI tihhmasawn dan tur rilru taka ngaihtuah ṭhin mi a nih thu a sawi.
ZPM-in candidate tur mi ṭha tak H Lalremtluanga an sáwm chhuak tih sawiin Sapdanga chuan, "ZPM ai mahin ward chhunga neutral mipuite'n inthlan an nghakhlel tawhin a lang. "Eptu party lian pahnihte pawhin ZPM leh a candidate hi inthuruala do rawn thamah an ngai. Chuti chung chuan pa fing tak tak an ngah tehreng nen, lusûn lai an han nawr lui erawh hi chu inbum dan rapthlak pawl tak a nih ka ring," a ti. Pathian leh mipui zarah AMC by-election-ah ZPM an chak ngei a beisei thu a sawi bawk.
K Sapdanga chuan, "Ration card, Assam ramri leh airport chungchangahte thu belhchian dâwl lo hmanga eptute'n mipui rilru hruai pên tuma an tithlabár fo hi a pawi tak zet... Sorkar ṭha nei tur chuan opposition party ṭha tak neih a ngai a, chutih laiin, opposition party-te'n sorkar tihbuai nan thu belhchian dâwl lo an hmang fo a, hei hi mipui nuihzat leh rin loh hlawh theihna a ni," a ti.
Home Minister chuan, tun hnaiah Assam lamin an duty camp bul leimin an thian fai tih sawiin, "Hei hi eptu party lamin mipui tihthlabâr nan hmangin thu an vawrh darh vak mai a, hetianga thu belhchian dâwl lo hmanga mipui rilru an kuai pêng ṭhin hi a pawi ka ti hle," a ti a; Assam sorkar nen tun hnaiah ramri chungchangah ṭha taka an sawiho thu a sawi.
K Sapdanga chuan Lengpui Airport chungchangah thutlukna siam a la ni lo tih sawiin, "Mizoram tana ṭha tur zirchianna neih a nih chauh laiin, eptu party lam chuan thutlukna siam ta ang maiin thuthang dik lo an vawrh darh leh chiam mai hi a pawi ka ti hle a ni," a ti.
Minister chuan, “Tun hnaia kan lungkham ber chu aikal tihbo a ni. Sorkar hmalaknain department tinah aikal an neih leh neih loh zawh a ni a, aikal titawp tura thuchhuah siam a ni bawk a, titawp lo department an awm chuan department hotute'n mawh an phur dawn. Aikal tihtawp vangin mipuiin harsatna eng emaw chen kan tâwk ngei dawn tih kan hotute'n an hmu tlang vek a, amaherawhchu, ram siamṭhat hna huaisen taka kalpui a ngai," a ti a; mipui pawh an chhel a ngaih thu a sawi.
Ration card chungchangah Sapdanga chuan, "Chhungkaw khawsak ziaawm zawk, ration card var hmangtute'n sorkar aṭanga buhfai subsidy-a an leina man tihsannaah hian chhungkaw harsa zawkte ration card eng leh card pâwl hmangtute a huam lo tih kan hriat a ṭha. Chhungkaw khawsak harsa zawkte tan phurrit tur a awm lo. Eptu party-te'n ration card chungchanga mipui thu an fah dan a dik tâwk lo," a ti.