MNF Legal Board-in Vanglaini lakah RO-ah complaint thehlut

MNF Legal Board chuan AMC Ward-VI by-election neih tura Congress party nen inthuruala candidate atana an thlan leh puan chhuah, Lalrinfeli chungchang Vanglaini chanchinbuin a ziah dan avangin nimin khan returning officer Mark Lalthanliana hnenah complaint an thehlut.

RO hnena complaint an thehluhah hian MNF Legal Board chuan, August 9, 2024-a chhuak Vanglaini-ah, 'MNF candidate Lalrinfeli chuan August 7 khan hming a lo pe lut tawh a ni,' tia tarlan a nih thu an tarlang a; Lalrinfeli chu MNF candidate a nih loh thu tarlangin, "Independent candidate, MNF leh Congress party-te'n an thlawp a ni a, nomination pawh i hmaah ngei 7th August 2024 khan a rawn thehlut a nih kha," an ti.

MNF Legal Board chuan Vanglaini chanchinbua tarlan dan chu mipui rilru dik lo taka hruai pên tumnaah an puh a; "Hetianga mipuite tichî-âi thei zawng leh nomination file danah pawh MNF candidate anga file lo a nih hre reng chunga Vanglaini chanchinbuin thu a chhuah ta mai hi a rang thei ang bera tihdikna (corrigendum) siam a, ngaihdam dilna anmahni chanchinbu ngeiah chhuah tura thu pe turin kan ngen a che," tiin an ziak a ni.