Har Ghar Tiranga Yatra neih a ni

India ram zalenna champha lawmna puala hnam puanzar zâr beihpui thlâkna ‘Har Ghar Tiranga’ pualin nimin khan Mizoram hmun hrang hrangah hun hman a ni a; Aizawlah chuan Art & Culture depart­ment bultumin Chanmari leh Sikulpuikawn aṭangin Vanapa Hall thleng hnam puanzar nen zirlaite'n kawng an zawh.

Chanmari leh Sikulpuikawn aṭanga Tiranga Yatra-ah hian Mamawii Higher Secondary School, JL Higher Secondary School leh Central Higher Secondary School zirlai 800 chuang telin, national flag kengin Vanapa Hall kawt thleng kawng an zawh a; a tawpna inkhawm tâwiah Aizawl bawrhsap Lalhriatpuia kaihhruaiin ‘Har Ghar Tiranga' thutiam an sawi rual.

Lungleiah pawh DC pisa huaihawtin Lunglei khawpui hmun hrang hrangah Tiranga Yatra buatsaih a ni a; kumin Inde­pen­dence Day-a parade contingent-a tel turte'n parade an zirna hmun aṭangin kawng an zawh a, thutiam an sawi rual a ni.

Siahaah chuan bawrhsap VL Hruaizela Khiangte hoin nimin zing dar 8 khan DC office kawt aṭanga Siaha Bazar (Traffic Point) thleng hnam puanzar nena kawngzawh buatsaih a ni a; Siahaa zirlaite leh mi dang ṭhahnem tak an tel. DC pisa tualah ‘Ram leh hnam hmasawn nan nunna chán tawhte kan ngaisangin kan ngaihlu che u a, kan hero in ni’ tih inziahna signature board-ah kal khawmte'n hming an ziak a, Har Ghar Tiranga thutiam an sawi bawk.

Khawzawlah chuan SDO (Sadar) Vabeimozachhi Chozah kaihhruaiin Mualvawm Field-ah Har Ghar Tiranga pualin zirlaite'n I-Day parade zir pahin kawng an zawh. Hnahthialah pawh bawrhsap Rita Lalnunmawii Pachuau kaihhruaiin Hnahthial High School leh Hnahthial Higher Secondary School zirlaite'n District Volleyball Court-ah 'Har Ghar Tiranga' pualin hun an hmang a ni.

Har Ghar Tiranga hi August 15, 2024 thleng kalpui tur a ni a, Aizawlah chuan vawiin hian Vanapa Hall-ah Tiranga Concert buatsaih tum a ni.

Har Ghar Tiranga campaign hi Azadi Ka Amrit Mahotsav hnuaiah mahni in ṭheuha hnam puanzar zàr a, mipui rilruah hnam puanzar ngaihhlutna a awm theihna tura beihpui thlâkna a ni a; August 13-15 chhung mahni in ṭheuhah hnam puanzar zár turin mipui ngen an ni. Mipuite chu #HarGharTiranga tiin social media-ahte thlalak dah tura ngen an ni bawk.