Sorkarin sawhthing lei a tum dan Congress-in a him tâwk loin an hria

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar theh­darh­tute an kâwm a; Mizoram sor­karin sawh­thing lei a tum dan sawh­thing chíngtute tan a him tâwk loa an ngaih thu an sawi.

MPCC treasurer Dr Lalmalsawma Nghaka chuan, tun hnaiah Agriculture Minister leh Adviser to CM-te'n thlai thar lei dan tur press mite hnenah an sawifiah tih a sawi a, "Sawhthing lei leh hralh chungchanga hma­lak an tum dan ṭhen­khat kha sawhthing chingtute tan him lo leh an hah thlawnna tur ni theia kan hriat avangin ṭha lo hleah kan ngai," a ti.

ZPM-in sawhthing leh thlai dang lei tura an intiamna chu mipuiin an ngai thutak nia sawiin Dr Lalmalsawma chuan, "Chhungkaw tam takin an ching. ZPM ruahmanna hi en thuak chuan ṭha âwm tak nia a lan laiin, zir chian chuan kut hnathawktute beidawnna thlentu mai a ni ang tih a hlauhawm," a ti a; sawhthingah sorkarin a insawi angin rua­hman­na fel tak a siam lo nia an hriat thu a sawi.

Dr Lalmalsawma chuan, ZPM sorkarin sawh­­­thing chu grade A leh B-ah ṭhen an tum nia sawiin, "Grade A chauh Rs 50 leh a chung lama lei tur an ti a, grade B chu a chíng­tute leh a leitute in­biakremna tura an dah hi ṭha lo kan ti. Mizoramah sawh­thing grade ṭhen a nih kan hre ngai lo. A leitute'n grade B anga sawhthing quality an ṭhen ṭeuh chuan a chingtute'n an tuar dawn," a ti.

MPCC Treasurer chuan, sawhthing leitute an fin phakar viau chuan sawhthing grade an tihniam vak thei nia sawiin, "Grade A emaw B emaw chauh emaw lei an tum thei a, chu chu ngaihtuah ngai a ni," a ti a; sawhthing grade ṭhen ni lo se an duh thu a sawi.

Khawpui mi sawhthing chingtute ta leisak an tum lo nia sawiin Lalmalsawma chuan ṭha lo an tih thu a sawi a, "Tu pawhin sawhthing a ching thei a, a chìnna khuaa society-ah a in-register a nih chuan an leisak ngei tur a ni. An manifesto angin society-a in-register-te sawhthing leisak an bá," a ti.

Dr Lalmalsawma chuan, khawpui aṭanga thingtlanga sawhthing chíng tam tak chu harsa leh rethei ve tak tak an nih thu sawiin, "Neih thinglung kháwnga hma la ve tho an ni tih kan hriatsak a ngai. Sawhthing chíng ṭheuh ṭheuh, inthliar hran hi thil dik a ni lo," a ti a, khawpui mi sawhthing chíngte sorkarin a ngaihven tel a ṭul thu a sawi.

MPCC Treasurer chuan, society hruaitu turte chu sorkar official-te ṭawiawm tura beisei an nih laiin, khaw khata ruling party hruaitute an inruat mai nia a lan thu a sawi a, "Sawhthing lei leh hralh hi society kaltlanga siam tur a nih dawn si chuan ngaihtuahna a tithui hle," a ti.

Tender hmanga sawhthing hralh bângte hralh dan turah company-te nen agreement siam ngei an duh thu te, company-te nen tender agreement mumal takin siam ngei tur a nih thu te, sawhthing lei tura agreement ziahpui zingah lei leh duh lohte an awm theih avangin loneitute guarantee pek ngei tur a nih thute a sawi bawk.