KHAWTHLIR
Thisen pe
Lunglei College NSS & Red Ribbon Club chuan nimin khan an college-ah thisen pek huaihawtin, Civil Hospital, Lunglei tan thisen unit 107 an pe a, petute mipa 73 leh hmeichhia 34 an ni. Evangelical Free Church of India (EFCI) KṬP, Saipum Unit pawhin nimin khan an kohhran hall-ah Kolasib District Hospital tan thisen unit 43 an pe a, petute mipa 30 leh hmeichhia 13 an ni.
Minister-in hawng
T Romana College faculty room thar leh New Age Learning Centre chu nimin khan Higher & Technical Education minister Dr Vanlalthlana'n a hawng. New Age Learning Centre hi TRC Library-ah dah a ni a, Aizawl Smart City Limited hmalaknaa siam a ni. Dr Vanlalthlana chuan MLA discretionary fund aṭangin library UPSC centre-a dah tur lehkhabu lei nan Rs 10,000 a pe nghal a ni.
Computer hlân
Lunglei district High Powered Committee vice chairman V Malsawmtluanga, MLA chuan nimin khan Rashtriya Gram Swaraj Abhiyan (RGSA) scheme kaltlangin a bial Lunglei North chhunga khaw pathum - Mausen, Zotuitlang leh Kanghmun South village council-te hnenah computer a hlân. MLA hian Ramlaituia SASCI sum hmanga kawng laih mek a enfiah bawk.
Independent candidate zawk
AMC Ward-VI by-election neih tura candidate pakhat Lalrinfeli chu August 9, 2024-a chhuak Vanglaini-ah MNF candidate anga tarlan a ni a; MNF candidate ni loin, 'independent candidate' tih zawk tur a ni. Tih dik tâwk lohah mipui hriatthiamna kan ngen e. Hemi chungchangah hian returning officer Mark Lalthanliana chuan MNF Legal Board-in complaint an thehluh bawhzuiin nimin khan Vanglaini-ah hriattirna a pe a ni.
Kual phal loh
Traffic SP Stephen Lalrinawma chuan Saron Veng aṭanga Bazar Bungkawn chhuah chiaha dinglama kual (right turn) phal loh hun a tidanglam a; zing dar 7 aṭanga zan dar 8 inkarah dinglam zawnga lirthei kual phal a nih loh thu a tarlang. Saron Veng aṭanga lirthei chhuak chhote chu Dawrpui West lamah kual thlak phal a nih loh thu leh, Dawrpui West aṭanga Bazar Bungkawna lirthei chhuak chhote pawh Saron Veng lamah kaltlang phal a nih loh thu a tarlang bawk.
Chei thar hawng
Chief secretary Dr Renu Sharma chuan nimin khan Mizoram Secretariat ground floor-ah Mizoram Secretariat chei thar, Renovated Secretariat building a hawng. Secretariat chei thar hna hi Mizoram PWD hnuaia Architecture Wing leh Mizoram PWD kaltlangin Aizawl Building Division-te'n an thawk a, senso atan Aizawl Smart City Limited aṭanga hmuh Rs 5,75,18,235 hman a ni.
Sawhthing zirho
Krishi Vigyan Kendra (KVK), Khawzawl chuan nimin khan Aiduzawl khuaa sawhthing chíngtu chhungkaw 54-te tan sawhthing chìn, enkawl leh sâwngbâwl dan zirhona an buatsaih. Khawzawl KVK senior scientist Dr Malsawmkimi leh Agronomy lama mithiam Rambuatsaiha ten thil pawimawhte an zirtir a ni.
EMRS training
Social Welfare & Tribal Affairs, Women & Child Development minister Lalrinpuii chuan nimin khan Durtlanga SIRD training hall-ah Eklavya Model Residential School (EMRS)-a thawktu lak tharte puala buatsaih Orientation Training a hawng. Training hi August 16, 2024 thleng neih tur a ni a; Mizorama EMRS 11-a thawktu lak thar mi 42, India ram hmun hrang hrang aṭanga tlingte an tel a ni.