Mipui tibeidawng mekah sorkar puh

MNF party chuan nimin khan an pisa Mizo Hnam Rûnah chhung inkhawm an hmang a, thu sawitu MNYF vice president Lalnunmawia Pautu chuan, ZPM kaihhruai sorkarin Mizoram mipui an tibeidawng mek niin a sawi.

MNYF Vice Persident hian tunlaia Mizoram dinhmun hrang hrangte leh ZPM sorkarin an thutiam an tihhlawhtlin loh dante a sawi a, "Anmahni thlang tlingtu Zoram mipui an tibeidawng mek a ni," a ti.

Cyclone Remal a thlen aṭanga ni 75 ral hnuah pawh tuiah harsatna naménlo a la awm zui zel nia sawiin Lalnunmawia chuan, "Sorkar hi mipui ta a nih bakah mipui tana ding an nih angin tui thianghlim hnianghnar taka kan dawn leh theih nan chak taka hma la turin kan phût a ni," a ti a; ZPM hotute'n dâwt an sawi 100 an hâl tawh thu sawiin, dâwt eng emaw zat hâl turin an lak khawm leh tawh thu a sawi.

MNYF Vice President chuan, tun hnaiah Zirsangliana, Parva leh Lalrinzuala, Ngunling khuate chu BSF-in kut an thlak nia sawiin, pawi an tih thu a sawi a, "Mizoram chhunga ram leilung fate zawkin kut kan tuar fo hi sorkar leh thuneitute inthlahdah vang a ni," a ti.