N Vanlaiphai-in I-Day boycott dawn

North Vanlaiphai All NGO Coordination Committee chuan, N Vanlaiphai High School headmaster leh Ayush doctor pakhat chu thlaktu awm loa sawn an nih avangin lungawi lohna lantir nan kumina Independence Day (August 15) an boycott dawn tih an puang.

N Vanlaiphai NGO-te hi nimin khan an ṭhukhawm a, resolution siamin, an khua tei tê zawnga sorkarin hma a la ṭhin chu hriatthiam har an tih thu leh H/S headmaster leh Ayush doctor dah thuai tura sorkar an phût thu an tarlang a, "Hei chen sorkar kan nghah hnu pawha sorkar aṭanga thu lawmawm kan hriat loh avangin kumin Independence Day programme N Vanlaiphaia hman tur chu boycott ni se kan ti a. Kan beisei anga sorkarin hmalakna a neih loh chuan a ṭul dan angin hma kan la zel dawn a ni," an ti.

NGO Coordination Committee tarlan danin, N Vanlaiphai H/S headmaster Lalnunzawmi'n July 1, 2023-ah a hna a zawm a, June 26, 2024 khan sawn chhuah niin, amah thlaktu tur dah a ni lo.

N Vanlaiphaia Ayush doctor awm mek pawh thlaktu dah loin June 28, 2024 khan sawn chhuah a ni a, ani hi March 10, 2023-a N Vanlaiphaia awm ṭan a ni.

N Vanlaiphai All NGO-ah hian Joint YMA, Joint MHIP leh N Vanlaiphai Area MUP-te an tel a ni.