Ṭawng tam, thawk tlem si-ah ram hruaitute a puh

BJP, Mizoram Pradesh chuan nimin khan Aizawla an pisaah political session an hmang a; thu sawitu Dr K Beichhua, MLA chuan, Mizoram sorkar hotute'n mipui hmaah thu an sawi ṭeuh ṭeuh a, hna an thawk tlem leh si niin a sawi.

Dr K Beichhua chuan, "Sap thufing chuan 'Work more, talk less,' (thawk tam la, ṭawng tlem rawh) a tih laiin, hun kal tawhah leh vawiin thlenga kan ram hotute min hruai dan erawh hi chu a in opposite hlauh thung a, mipui hmaah thu kan sawi ṭeuh ṭeuh a, hnathawhah erawh kan thawk tlem leh si hi a zia lo hle a ni," a ti.

Ram hruaitute'n mipui hmaa thu an tiamte a hnuah 'kan ti lo' an tih leh ṭhin avangin Mizoram mipuite ei leh bar zawnna leh ni tin nunphungah a ngaihna hre loin an awm nia sawiin Beichhua chuan, "Laklawk takin, tuilai rapin kan awm phah ni maiin a lang," a ti a; ngun taka an ngaihtuahnate séng turin Mizoram mipui a sáwm.

Dr K Beichhua chuan, Mizoram mipuiin BJP dinhmun chiang taka an hriat hunah BJP hlauhawm lohzia an hre dawn nia sawiin, "BJP hi a hlauhawm lo a, malsawmna kan dawnna hnár tur zawk a ni tih hi tun aṭanga rei vak loah kan la hre chhuak ngei ngei dawn. Chu'ng hnuah chuan he kan ram neih chhun hian hmasawnna tluantling kan nei ve dawn chauh a ni," a ti.