Home Minister-in ramri a tlawh

Home minister Lalchamliana chuan nimin khan Vairengte leh Saihapui-V khuaa Mizoram-Assam ramri leh ramria duty Border Security Force (BSF) leh Mizo IR sipaite duty-na hmun a tlawh.

Home Minister chuan, ramri venga duty-te inpekna leh thawhrimnaah lawmthu sawiin, "Mizoram sorkar leh mipuite'n kan thláwp tlat che u. Ramri vénga Krismas leh kumthar hun lo thleng turah pawh ram leh mipui tana thawk in ni tih hre rengin, thâ thlah loin ṭha takin kalpui zel ang che u," a ti a; Krismas an hmanna atan thilpek a hlân.

Lalchamliana hian Vairengte auto stand thlanga BSF sipai leh Mizo IR police duty-na hmunte leh Saihapui-V leh Phainuama BSF leh IR sipaite duty-na hmun a tlawh a; duty post thawm ṭhat lehzual dan tur a enfiah.

Home Minister hi DIG (Northern Range) Lalbiakthanga Khiangte, Kolasib DC Dr H Lalthlangliana leh SP Vanlalfaka leh, 1st IR commandant MS Dawngliana ten an ṭawiawm a ni.